TUNGOD ba kaha sa makasagmuyong performance sa Team USA sa bag-o lang natapos nga 2019 World Cup sa China, duha ka mga NBA superstars nga sila si Stephen Curry ug Damian Lilliard mikomiter na nga moduwa sa Tokyo 2020 Olympics.
Sa niaging semana, ang Team US nga gilangkuban sa minus og mga star players igo lang nilandig sa ikapito nga puwesto.
Apan sa umaabot nga Olympics, gipanglantawan nga posibling moduwa na og balik ang mga nag-unang dekalidad ug superstars nga makahimo kanilang inilog sa torneyo.
“That is the plan for sure,” padayag ni Curry sa interiew sa Rachel Nichols sa ESPN. “You know, obviously, knock on wood, you don’t want any injuries or things like that to interfere,” dugang niya.
Si Curry nakaduwa og kaduha sa World Cup championships sa Team USA nga pulos naka gold, ug sa unang higayon ang Olympic na usab ang iyang target sa sunod tuig.
“The Olympics is the experience that I want. And next year will hopefully be it,” nagkanayon ang three-point artist sa Golden State Warriors.
Samtang mao usab kini ang gisaad ni Lillard sa Portland.
“I plan on being a part of that. I plan on playing,” ingon ni Lillard sa news.com.au.
Si Jerry Colangelo, ang top official sa Team USA, mipadayag nga anaa sa iyang mahinumdoman kadtong mga players nga wala mopakita sa Fiba World Cup sa higayon nga mangandam na unya sila alang sa Olympics. (JBM)