LALAKENG high value target nadakpan ug nakuhaan og shabu nga balor og P2.8 milyunes sa Mambaling Police Station niadtong Miyerkules sa gabii, Septiyembre 19, sa Barangay Duljo Fatima, Siyudad sa Sugbo.
Ang buy-bust gipangulohan ni P/Capt .Francis Renz Talosig, hepe sa Mambaling Police Station, uban sa iyang Drug Enforcement Unit (DEU) nga niresulta sa pagkasikop ni Ronie Padilla, 40, taga Barangay Duljo Fatima ning siyudad.
Matod ni Talosig nga naplano ang buy-bust batok kang Padilla human siya ang gitudlo sa ilang impormante nga mihatag kanila og impormasyon sa mga ilegal nga kalihukan sa suspek.
Dugang pa ni Talosig nga halos duha ka semana ang ilang pag-monitor kang Padilla hangtud na nga naka dawat sila og impormasyon nga bag-o lang siya gihatdan og shabu alang sa iyang mga suki.
Si Padilla gihulagway sa kapulisan nga HVT sa Central Visayas tungod sa iyang koneksiyon.
Wa gisulti ni Talosig kon kinsa ang amo ni Padilla. Giingong makahurot si Padilla og tunga hangtud na sa usa ka kilo matag semana.
Pasakaan siyag kasong kalapasan sa Comprehensive Dangerous Drugs Act of 2002. (BBT)