GIPAUBOS na sa state of calamity ang tulo ka mga sitio sa Barangay Basak Mambaling sa Siyudad sa Sugbo nga apektado sa sunog niadtong Miyerkules, Septiyembre 18.
Daling nipahigayon og special session sa Miyerkules sa gabii ang mga barangay opisyal aron pagdeklarar nga ubos na sa state of calamity ang mga sitio Wang-yu, Ipil-ipil ug Abbya.
Matod ni Barangay Kapitan Gines Abellana nga kini aron mapagawas na dayon nila ang P300,000 nga calamity fund.
Niapud-apud na sa food packs ang taga City Social Welfare Services ngadto sa mga tawo nga biktima sa sunog.
Apan alang sa motabang sa mga nasunugan, matod sa mga biktima ug mismo sa taga CSWS, nga nag-una nila nga gikinahanglan mao ang mga hygiene kit, underwear, tubig, ug gamit sa pagkatulog.
Lakip na usab ang mga sapot ug gamit sa pagpatindog og balik sa ilang mga balay.
Si Mambaling barangay administrator Jojo Ylaya nga nahinabi sa Superbalita Cebu nipahibawo nga ang pundong P300,000 bahinbahinon sa mga pamilyang apektado.
Sa labing ulahi nga lista nga nakuha sa Superbalita Cebu sa ala 1 sa Huwebes sa hapon sa ilang social worker, 51 ka mga balay ang nangaugdaw, 97 ka mga pamilya ang apektado ug 452 ka mga tawo ang nawagtangan og pinuy-anan.
Anaa ang taga medics alang niadtong mga adunay gipamati sa lawas, Huwebes sa buntag, Septiyembre 19. Aduna nay kapin sa 40 ka mga biktima sa sunog ang nasuta nga nitaas ang ilang blood pressure.
Anaa usay lima ka mga tawo nga nagpatabang sa pagpanghinlo ug pagpatambal sa ilang samad tungod sa mga natamakan nga lansang atol sa sunog.
Bisan kon gihimo nga evacuation site ang ilang gym sa Abbya, kadaghanan sa mga nasunugan mas nipili nga magtulda-tulda lang diha sa luna diin nasunog ang ilang mga balay.
Gitug-an usab ni Marinella Batobalonos, barangay health worker, nga adunay mga bata nga lakip sa biktima sa sunog ang wala katungha human nga lakip ilang mga uniform ug gamit sa pagtungha nangasunog. (dugang taho ni BBT)