ANG Young Ladies Association of Charity Inc. (YLAC) Cebu City Unit ug ang Cebu City YLAC School Foundation Inc. mosaulog sa ilang ika-70 nga anibersryo o jubilee sa pagkatukod karong Dominggo, Septiyembre 22, 2019.
Ang YLAC Cebu City Unit giorganisar niadtong 1949 dihang grupo sa kababayen-an ubos sa pagpangulo ni lmelda Borromeo-Cancio nakahukom sa pagtubag sa daghang problema sa kabus nga mga Sugbuanon - edukasyon sa ilang mga anak.
Mao hinungdan nga natukod ang Cebu City YLAC School.
Ang tunghaan nahimong nag-unang tinubdan sa garbo ug inspirasyon sa YLAC members.
Kini naghatag og batakang edukasyon sa mga batan-on ug naapilian nga pamilya sa Sugbo.
Ang ilang graduwado nahimong saksi nga ang kakabus dili babag sa pagkuha sa maayong kinabuhi alang sa ilang mga minahal pinaagi sa edukasyon.
Ang mapasigabuhong sinugdanan sa tunghaan sa Legazpi St. diha sa pagkuha sa gikinahanglan nga pundo sama sa foster-parent drive ug sa kataposan, nakakaplag og permanenteng lokasyon sa P. Gomez St., ang tunghaan nakabarog sa dagan sa panahon.
Ang Cebu City YLAC School Foundation Inc. nagsugod nga hingpit nga libre sa paghatag og edukasyon sa mga kabus ug dunay malantip nga pangutok nga bata.
Apan sa miaging tulo ka tuig, ang tunghaan nakasugat og problema sa panalapi ug napugos sa pagpahamtang og gamay sa matrikula, apan nagpadayon ang foundation pagsuporta sa mga kabus nga bata.
Sa pagkakaron, ang tunghaan dunay 437 ka mga tinun-an, staff ug mga magtutudlo. Dunay mas dako nga lawak-saringan ug multi-purpose area.
Ang Cebu City YLAC Unit naglaom nga mohatag og edukasyon nga dunay mithi sa pagka Kristiyano ug malangkubon nga paglaom sa pag-umol sa mga bata nga mahimong socially responsible citizens sa umaabot.
Ang anniversary celebration pagasugdan sa misa sa alas 9:00 sa buntag karong Dominggo, Septiyembre 22, sa Cebu City YLAC School lobby, diin pangulohan sa YLAC alumnus, Fr. Russel Rupecio, ug homilist mao ang iyang long-time spiritual director, Fr. Ulrich Schlect SVD.
Human sa misa, ang newly-accredited YLAC members manumpa.
Ang misa pagasundan sa awarding sa outstanding benefactors, donors, individuals, entities ug members kinsa nagsuporta sa YLAC Cebu City Unit ug Cebu City YLAC School Foundation, Inc sulod na sa 70 ka tuig.
Dunay alumni activities, naglakip sa gipaabot nga indigay sa kaanyag ug kalantip sa pangutok, ang "Ms. YLAC Alumni.
Usa ka community lunch sa Kusina ni Sta. Martha mosilbi sa mga walay pinuy-anan. (PR)