SUPERBALITA CEBU

Sinas mihatag og igong panahon pagtahan sa priso

GIBYAHE: Ang mga ningtahan gidala sa Leyte Regional Prison Bureau of Corrections sa Abuyog, Leyte gikan sa CIDG 7 sa Camp Sotero Cabahug, Gorordo Ave., dakbayan sa Sugbo. (Amper Campana)

NAPUPOS karon, Biyernes, Septiyenbre 20, ang gihatag nga tagal ni Presidente Rodrigo Duterte pag pa surrender niadtong mga kombiktado nga binilanggo sa Bureau of Corrections (Bucor) nga nakagawas tungod sa balaod sa good conduct time allowance (GCTA).

Mibahad ang pangulo nga kon magmagahi sila sa pag tuman sa iyang kamandoan mohatag siyag patung sa ulo nga tag P1 million aron lang madakpan pagbalik ang maong mga binilanggo.

Apan si Police Brigadier General Debold Sinas, hepe sa Police Regional Office (PRO) 7, mohatag una og igong panahon pa sa mga kombiktado sa pagtahan sa ilang kaugalingon sa labing duol nila nga police station.

Sama sa miaging mga semana, ang Criminal Investigation and Detection Group (CIGD) 7 ang motapok kanila ug sila na usab ang modala sa Abuyog Penal Farm sa lalawigan sa Leyte.

Kon magmagahi gihapon sila ug wala gihapon mosanong sa ilang panawagan, ang giumol nila nga task force nga pangulohan sa CIDG 7 ug Regional Special Operations Group 7 nga maoy gitahasan nga mohimo sa manhunt operation.

“Naa na koy gi-create nga manhunt composed of CIDG personnel ug naay akoang RSOG para mo track sa ilaha para pangdakpon sila because that is the instruction of the president,” matod ni Sinas.

Nihangyo nalang ang heneral sa mga nakabenepisyo sa GCTA law nga mo-surrender nalang aron walay mahitabong kagubot ug dali nalang unya ang pag proseso kanila pabalik sa pasilidad sa Bucor.

Makig-alayon si Sinas sa bag-ong milingkod nga hepe sa CIDG-7 nga si Police Colonel Rommel Ochave nga sakop sa Philippine National Police Academy (PNPA) class of 1996.

Matod ni Sinas nga sila ang adunay listahan sa mga binilanggo nga naa dinhi sa rehiyon 7 nga maoy ilang basehan sa ilang pagpangita. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph