PATAY ang usa ka lalaki human nabangga ang motorsiklo nga gidrayban samtang samdan sab ang usa ka pulis nga katabo niini niadtong Septiyembre 18, alas 7:30 sa buntag sa Barangay San Juan, Gingoog City, Misamis Oriental.
Gideklarar nga dead on arrival ang driver sa motorsiklo nga si Mark Jun Aca Amba, ulitawo, taga Barangay Sapong, lungsod sa Lagonglong.
Samaran ug ubos sa obserbasyon ang pulis nga si Police Master Sargent Arvie Cainoy, 39, taga Brgy. 19, Gingoog City ug nadestino sa Medina Municipal Police Station.
Sa inisyal nga imbestigasyon sa traffic section sa Gingoog City Police Station, nasuta nga paingon sa city proper sa Gingoog si Amba dihang mi-overtake kini sa laing sakyanan.
Maoy rason nabangga niini ang motorsiklo sa pulis nga anaa sa pikas linya nga padulong na unta nga mo-duty.
Sa kakusog sa impak nagrabehan si Amba labina nga wala sab kini nagsul-ob sa iyang helmet niadtong tungora.
Giingong ang dalan sab adunay duha ka yellow lanes nagpasabot ginadili ang pag-overtake sa dapit.
Gidali pa og dala si Amba sa Misamis Oriental Provincial Hospital sa Gingoog City apan gideklarar nga patay.
Si Cainoy kinsa nakaangkon sab og mga pangos ug bun-og sa kalawasan ang anaa gidala sa Lipunan Hospital sa dakbayan.