SUPERBALITA CAGAYAN DE ORO

Oro vice mayor gigamit sa pagpangilad

NAGPAGAWAS og pahimangno ang lokal nga kagamhanan sa dakbayan sa Cagayan de Oro ngadto sa publiko ilabi na sa mga kan-anan human dunay lain na usab nga nangilad gamit ang ngalan sa opisyal sa city hall.

Giingong gigamit sa mga wala mailang suspetsado ang ngalan ni Vice Mayor Kikang Uy ug nangilad niadtong Septiyembre 18 diha sa usa ka giingong Korean restaurant.

Sa impormasiyon nga nahipos, gikabutyag nga mga alas 10:30 sa buntag nakadawat og tawag maong restaurant nga magpa-reserve og pagkaon alang sa 20 ka tawo hinungdan nga nangutana kini sa ngalan ug numero apan moingon lamang ang nanawag og tawo siya ni Uy.

Pipila oras nanawag na usab kini og nangutana kong makahatag ba sila og ilimnong makahubog hinungdan nga usa sa mga trabahante ang gisugo sa pagpapalit og ilimnon sa gawas.

Sa sunod nga pagtawag, giingong naghangyo na usab kini nga magpa-load sa cellphone. Niabot sa P15,456 ang kinatibuk-an sa order sa maong nanawag lakip na ang dul-an usa ka libo nga kantidad sa gi-order nga manok.

Ang gikabalaka sa mga trabahante tungod kay human naloadan ang cellphone dili makontak ang suspetsado.

Tungod sa hitabo, nagpagawas og abiso ug pahimangno ang lokal nga kagamhanan sa siyudad ilabi na ni city information officer Maricel Casiño sa City Information Office (CIO) kalabot na sa maong pagpangilad.

“Giabisohan ang katawhan hilabina ang mga tag iya sa restaurants sa pagbantay sa mga scammer o mangingilad nga magpaka-aron ingnon nga staff sa mga politiko hilabina sa City Hall officials,” pahayag niini.

Giingong angayang sutaon una ang kamatuoran diha sa mga hingtungdan nga politiko kalabot na sa susama niini nga pagpangilad o motawag sa emergency number nga 911.

Nasayran nga niadtong nilabay nga panahon laing patigayon usab ang nabiktima human nga gigamit usab ang ngalan sa laing opisyal sa siyudad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph