UPAT ka mga sakop sa Kinatas-ang Kahugpungan sa Kapupud-an Datu Alimaong gidakop sa kapulisan sa Dakbayan sa Sugbo human gialarma sa mga manindahay sa Freedom Park sa merkado publiko sa Carbon, Dakbayan sa Sugbo Huwebes sa buntag, Septiyembre 19, 2019.
Mga tindera nangayog tabang sa kapulisan human giingong nangayo kini og bayad sa giingong paggamit sa yuta samtang nakauniporme kini og sama sa sundawo.
Si P/Capt. Franklin Tale, officer-in-charge sa Carbon Police Station, nga nahinabi sa mga tigbalita, niingon nga sa ilang pagkadawat sa tawag sa vendors, ila dayong gitubag ang alarma.
Giila ni Tale ang mga suspek nga sila si Kali Sirol, 41, lumolupyo sa dan Sanciangko, Barangay Pahina Central; Datu Elra Kidlat, 40, taga Barangay Tejero; Kali Panter, 49, taga Sitio Bahaw, Barangay T. Padilla; ug Datu Apo RH Kabales, 48,taga Barangay Pahina Central, Siyudad sa Sugbo.
Apil nga niresponde sa mga sakop sa Carbon Police mao ang Special Weapons and Tactics (Swat) sa Cebu City Police Office.
Matod pa ni Tale nga legal ang pagkadakop tungod sa sumbong sa mga tindera ngadto kanila ingon man ang pagkarekober sa ilang posisyon sa tag-as nga mga sundang ug kutsilyo nga anaa sa ilang kiliran ug hawakan.
Si Panther nakuhaan og usa ka kalibre .45 nga pistola nga dunay 44 ka mga bala.
Dugang pa ni Tale nga ang upat ka mga suspek gikan sa landfill sa Barangay inayawan aron pag-awhag sa mga residente nga mohatag og bayad sa yuta nga gitarokan sa ilang balay.
Si Datu Dontito Leon Kilat, pangu sa KKK-A, niadto dayon sa Carbon Police Station human mapahibawo sa pagkadakop sa iyang mga miyembro.
Matod ni Leon Kilat nga ang pagdakop sa mga pulis sa upat niya ka mga miyembro illegal.
Nangutana siya nganong di tahuron ang balaud, sumala sa nalatid sa Republic Act No. 8371 kun Indigenous People’s Right Act of 1997 (IPRA).
Matod ni Leon Kilat nga ang pagdala og mga hinagiban sa iyang mga sakop alang sa pagproteher sa ilang kaugalingon.
Si Leon Kilat nipasabot nga ubos sa IPRA law, legal kini tungod kay duna silay gihuptang mga papelis subay sa tribal government.
Siya nipasangil nga ang balaud sa estado ug sa ilang tribal government managlahi.
“Naa nay papers, dili na ilegal ang ilang pagdala,” matod ni Leon Kilat.
Siya nipasangil nga kalit lang gipangdakop ang iyang mga sakop bisan kon way nangreklamo.
“Ang kanang mga reklamo you have to qualify kay kanang mga reklamo dili tanang reklamo insakto. Wala man gali moatubang dinhi,” dugang niya.
Gusto ni Leon Kilat nga kon duna man gali reklamo, kinahanglan nga mohimo kaniya og pormal nga sumbong kalabot sa mga pasangil batok sa upat ka mga miyembro.
Karong adlawa ipasaka sa kapulisan ang mga kasong ilegal nga paghupot og armas ug pagdala og mahait nga mga hinagiban batok sa upat ka mga sakop sa Alimaong.