MGA duwa karon:
12:30 pm - DBTC batok SHS-AdC (High School)
2:00 pm - UC batok CITU (High School)
3:30 pm - SWU batok USC (College)
5:00 pm- UC batok USJ-R (College)
Pahugtan sa Southwestern University (SWU)-Phinma Cobras ang ilang paggunit sa liderato sa ilang pagpakigsangka sa University of San Carlos (USC) Warriors sa ikatulong duwa karong hapon sa Cebu Schools Athletic Foundation (CESAFI) basketball college division sa Cebu Coliseum.
Ang Cobras, nga usa sa labing mga inilog ning tuiga human sa dominasyon niini sa pre-season nga mao ang Partner’s Cup, kasamtangang nag-inusara sa ibabawng bahin dala ang 2-0 nga rekord.
Sa nag-una nilang duha ka mga tahas, gipangbuntog sa Cobras ni coach Mike Reyes ang University of Cebu (UC) Webmasters, 65-58, unya gisundan kini nila og dakong kadaugan batok sa University of Southern Philippines Foundation (USPF) Panthers, 86-66.
Ang maong mga kadaugan nagpamatuod nga dili taphaw ang paghari sa Cobras sa Partner’s Cup, usa kini ka timailhan nga determinado silang moilog sa korona gikan sa Grandslam champions University of the Visayas (UV) Green Lancers.
Batok sa Warriors nga kasamtangang naa sa ikaduhang luna dala ang 3-1 nga rekord, gituohan nga makasugat og saktong kombati ang Cobras.
Ning sangkaa, masukod kon unsa na ka lig-on sa puwersa sa Cobras gumikan kay dili ikalimod nga aduna say saktong ikabuga ang Cobras.
Gisugdan sa Warriors ang torneyo pinaagi sa pagbuntog sa Panthers, 80-75, pinaagi sa overtime.
Apan human niini, nasugamak ang Warriors sa dakong kapildihan batok sa Green Lancers, 53-74.
Hinuon ningbawi dayon ang Warriors ug namungot sa nagsunod nilang mga kontra nga mao ang Jaguars, 62-55, ug Cebu Institute of Technology University (CITU) Wildcats, 81-74.
Sa main game, magsangka ang Webmasters ug Jaguars sa laing kombati sa college division.
Bisan aduna ra sila’y 1-2 nga rekord, ang Webmasters aduna gihapoy taas nga moral gumikan kay gikan sila sa makapakurat nga kadaugan batok sa Green Lancers, 72-64.
Ang Jaguars adunay 1-1 nga rekord.
Sa high school division, magsangka ang Sacred Heart School - Ateneo de Cebu (SHS-AdC) Magis Eagles batok Don Bosco Technological Center (DBTC) Greywolves sa premirong duwa.
Mosunod niini ang engkuwentro sa UC Baby Webmasters batok CITU Wildkittens. (ESL)