UNSA kaha’y resulta kon magbinukbokay sila si Filipino Manny Pacquiao ug Ukranian Vasyl Lomachenko?
Daghang boxing fans ang nakapangutana niini apan ning puntoha, daw usa ra ka pantasya nga magkrus ang dalan sa duha ka bantugang mga boksidor nga ningdominar sa kalibutan sa boksing sa managlahing mga dekada.
Nanghawod si Pacquiao gikan niadtong 2010 hangtod na sa 2010 ug nisunod si Lomachenko human niini.
Kon hunahunaon, kuli nga mahitabo nga magkaaway sila si Pacquiao, 40, ug Lomachenko, 31, gumikan kay gawas nga lagyo ang gintang sa ilang edad, layo sab ang gintang sa ilang timbang.
Apan alang sa beteranong promoter nga si Bob Arum, dili kini imposible kon gamitan kini og catchweight.
“On Lomachenko v Pacquiao, we can never say never. But I mean you don’t take a guy who’s 126-lbs and have him fight at 147-lbs,” matod ni Arum sa interbyu sa www.boxingscene.com.
Dihang siya pa ang nagdumala ni Pacquiao kaniadto, naparang ni Arum ang Pambansang Kamao ng Pilipinas batok sa mas bug-at nga mga kontra pinaagi sa catchweight diin nagmalampuson ang fighting senator.
Lakip sa dekalidad ug mas bug-at nga mga kontra nga ningyukbo ni Pacquiao mao sila si Oscar Dela Hoya, Miguel Cotto, ug Antonio Margarito, an.
Ning higayuna, daw tinguha ni Arum nga balihon ang sitwasyon diin si Pacquiao na ang makigkontra og mas gaan nga boksidor pinaagi sa catchweight.
Gipadayag ni Arum nga interesado siyang lihukon nga magkaaway sila si Pacquiao ug Lomachenko apan ning puntoha, hanap pa kini nga madayon. (ESL)