NAGTINGUHA ang Samahang Basketbol ng Pilipinas (SBP) nga kuhaon si multi-titled coach Tim Cone aron maoy mogiya sa Gilas Pilipinas nga modepensa sa ilang gold medal sa 2019 Southeast Asian Games nga ipahigayon sa Pilipinas sugod karong Nobiyembre 30.
Si Cone, kinsa maoy labing malampusong coach sa Philippine Basketball Association (PBA) diin nakabira na kini og 21 ka mga titulo, maoy numero uno sa listahan sa SBP.
Sila si SBP chairman emeritus Manny V. Pangilinan ug president Al Panlilio wala maglangan sa pagpangita og bag-ong coach sa Gilas Pilipinas human miluwat sa iyang katungdanan si Yeng Guiao.
Miluwat sa iyang katungdanan si Guiao human sa mangil-ad nga kampanya sa Gilas Pilipinas sa bag-uhay lang nahuman nga FIBA Basketball World Cup.
Si Cone nahimo nang national coach niadtong 1998 dihang naporma ang Centennial Team nga gilangkuban og PBA superstars sama nila ni Alvin Patrimonio, Johnny Abarrientos, Vergel Meneses, Marlou Aquino ug Allan Caidic.
Nanghinaot sila si Pangilinan ug Panlilio nga ilaha nang ikasabot si Cone sa labing dali nga panahon.
Ang Gilas Pilipinas nga mohamag sa SEA Games langkuban og sagol PBA ug amateur players. (ESL)