Nadela: Pilion ang barkada nga masaligan

KABAHIN sa paglambo sa pangutok sa mga batan-on mao ang pagpakiglambigit sa iyang isig ka tawo. Ilabi na sa susama niya og pangedaron. Di malikayan nga sa iyang pagtungha makabaton siya og daghang higala.

Mga higala nga mahimong kadangpan ilabi na sa panahon sa kalisdanan. Mga higala nga makig-unong sa panahon sa panginahanglan. Ang sakit nga kamatuoran kay di tanang higala masaligan. Naay uban moila nimong higala kon duna pa silay makuha nimo. Pero kon wala na, lisod nang sampiton. Mao ni sila ang gitawag nga higala sa maayong panahon. Mag bagyo na gani di na masampit.

Ang pinaka grabe sa tanan kanang pahimuslan. Himoon kang gatasan. Kon wa na gani kay nahot, di na magpakita. Karong bag-o mabaniog ang nahitabo sa usa ka tinun-ang babaye nga gimolistiya sa iyang mga higalang lalaki.. Basi sa pasiunang imbestigayon hubog ang biktima.

Ang pait kay gi-video ang panghitabo ug napasa ngadto sa uban. Luoy kaayo ang biktima. Labaw sab nga makalolooy ang mga suspek. Unsa sila nga klase sa pagka barkada nga nakaako man pag-unay sa ila ra sab nga higala? Mao nga ning panahona kitang mga ginikanan kinahanglan nga magmabinantayon kanunay sa kalihukan sa atong mga anak.

Magpakisayod ta kinsa ning ilang mga barkada. Unya kamo sab nga mga batan-on hashasi og maayo kinsay angay ninyong ilhon mga higala. Ayaw pataka og dasmag basin sungayan nang nagpa ayo ayo nimo. Ang giingon bitaw sa ninong sa akong anak nga babaye, kanang barkada nga maisip nga bad influence maoy bantayanan kaayo. Magsugod sa inom inom hangtod nga mapunta sa paspas kaayong nikuyanap karon nga party drugs.

Mao ni ang pinaka delikado sa tanan. Gawas nga makamatay, sa bilanggoan pa gyud ang padulngan sa uban. Sa atong panahon karon nga ang pagpamakak sayon na kaayong buhaton ginamit ang cellphone, mas maayong kontrolahon kini apil na ang ubang gadget.

Kinsa man ninyo ang nasayod sa password sa Facebook account sa inyong anak? Apil ba ni sa inyong gimonitor? Way problema sa mga nagbinuotan. Pero kon kamo nagduda sa lihok sa inyong mga anak, ang akong giingon nga pamakak maiy pinaka delikado sa tanan. Ang di pagsulti sa tinuod sa iyang mga lakaw nga lahi ang gipananghid kay sa giadtoan, manghinaot lang ta nga di kini mosangpot og kaalautan.

•••

Gitawgan ko gahapon sa akong suod nga higala, ang kanhi President sa Defense PNP Press Corps og karon usa na sa mga opisyal sa City of Naga, Gary Cabotaje, nga nagpahinumdum nako sa unang anibersaryo sa landslide sa Barangay Tinaan.

Natayming sab nga nagbiyahe ko padung sa lubnganan sa akong Papa Dading diin gihandum sab sa among pamilya ang ika trese ka tuig nga kasumaran sa adlaw diin gitawag siya sa Labawng Makagagahum.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph