UNSA ning dispatser, gitugotan ba? Dihay higayon nga gipangdakop kini sila sa awtoridad o kapulisan. Makasabot kita nga dunay dispatser sa mga dagkong terminal sa bus ug van kay usahay moabag sila sa pag-alsa sa mga bug-at nga kargamento sa pasahero.
Ang makalibog nganong kon dunay dispatser sa taxi o jeepney sa pipila ka dapit sa dakbayan, labina duol sa mga mall diha sa dalan Colon, dapit sa uptown area ug ubang bahin sa dakbayan sa Sugbo. Kini panginabuhi nga walay kalahian sa pagpakalimos sa dan. Pwera lang sa mga dispatser sa mga dagkong terminal.
Bisan dili ang dispatser mao ang nga nagtawag og pasahero, awtomatik kini mangayo og kuwarta sa drayber. Sumala sa mga drayber, dili kini modawat og piso-piso lang. Labing minos singko pesos gyud. Dugang sa mga drayber, mapugos sila sa paghatag og kuwarta human timan-an kini o initan.
Dihay kaso niadto nga gidunggab ang drayber nga dili gyud mohatag og kuwarta sa dispatser. Busa, giestrikto ug gipangdakop hinungdan nangawala sila og kaladali. Apan sa pagdagan sa panahon, namalik na usab. Mas migara pa human wala nay pagtagad ang awtoridad.
Sa siyudad, dili na gyud kinahanglan ang dispatser labi na sa dalan Colon. Hinanggaw kini. Makaluluoy ang mga drayber nga nag-apas intawon sa pagpamasahero ug sa kasayon lang, kuhaan og singko-singko pesos matag dapit nga dunay dispatser. Dako na kini sa tibuok adlaw nga pamasada.
Samtang, makaduda kon asa gastuhon sa mga dispatser ang ilang nalimos. Sa pamilya kaha? Kon magbase ka sa ilang panagway diin daghang kanila adikon tan-awon, segurado nga magasto lang kini sa ilang bisyo o sugal.
Sumala pa, ang gihimo sa mga dispatser maoy dayag nga tulis sa atubangan sa mga drayber. Nganong gipasagdan sa kapulisan? Dili man kaha nila kini kakunsabo? Aksiyoni kini.