NIPADAYAG og kaandam ang usa ka dakong land developer sa Dakbayan sa Sugbo pagtubag sa panawagan ni Mayor Edgardo Labella pagtukod og medium rise building pinaagi 5 porsiyento nga bahin sa local government unit.
Si City Administrator Floro Casas Jr., nagkanayon nga niadto sa iyang buhatan ang representante sa Ayala Land Incorporated ug nitanyag sa ilang kaandam pagtabang sa administrasyon ni Labella.
“Na-inspire sila sa pronouncement ni Mayor regarding sa atong ground breaking sa medium-rise-building. Ni-offer sila nga kon pwede mo-adopt sila og usa ka housing project ni Mayor, unya mao na to ang i-consider nga compliance nila sa legal requirement sa socialized housing,”padayag ni Casas.
Ang city administrator nagkanayon nga kon motugot si Labella sa tanyag sa Ayala Land, ang City Government na ang mangita og luna aron adto itukod ang MRB nga alang sa mga way balay ug underprivileged nga mga Sugubanon.
Atol sa ground breaking sa MRB sa Barangay Lorega, gibutyag ni Labella nga wa gikolekta sa miaging mga administrasyon ang nalatid sa provision sa Urban Housing and Development Act (UDHA) diin ang mga LGU adunay 5 porsiyento nga bahin sa development sa condominium ug 20 porsiyento kon mopatukod sila og subdivision. (PAC)