UPAT ka mga piniriso nga taga probinsiya sa Sugbo nga nakapahimus sa Good Conduct Time Allowance (GCTA), ningtahan sa wa pa mapupos ang 15 ka adlaw nga panawagan ni Presidente Rodrigo Duterte sa ilang pagtahan.
Gawas sa unang 40 ka mga kombiktado nga gidala na sa Leyte Regional Prisons sa Abuyog, Leyte, dugang upat ang ningtahan niadtong Huwebes, Septiyembre 19 sa upat ka mga police station sa lalawigan sa Sugbo.
Sa Aloguinsan, gibutyag ni P/Ssgt. Marvin Hobahib sa Aloguinsan Police Station nga alas 5 niadtong Huwebes sa hapon, usa ka Nelson Agustin, 59, lumolopyo sa Purok 3, Barangay Tampa-an, nitahan kanila.
Matod ni Hubahib nga nakagawas si Agustin niadto lang Agusto 1 sa Iwahig Prison and Penal Farm. Siya nabilanggo sud na sa 29 ka tuig sa duha ka mga kasong rape.
Laing piniriso nga nitahan sa kapulisan mao si Ceasar Buhawi Jr., 27, taga Barangay Pandang, Dakbayan sa Bogo.
Si P/Msgt. Alexis Camelo Villacrusis sa Bogo City Police Station niingon nga alas 4 Biyernes sa hapon nitahan sa ilang buhatan si Buhawi.
Si Buhawi nga dunay kasong murder niadtong 2010, napriso una sa Bogo City Jail gikan sa Abril 2010 hangtud na sa Hulyo 2016.
Gidala siya sa New Bilibid Prisons (NBP) ug napriso sulod sa duha ka tuig.
Nahatagan siya og parole niadtong Hulyo apan niadtong Septiyembre 18, si Parole Officer Paul Banez nitawag kaniya sa pagtahan sa kapulisan.
Samtang sa dakbayan sa Toledo, laing duha pa ningtahan sa kapulisan sa samang adlaw.
Si Rey Antonio Ombao, 47, taga Barangay Das, Dakbayan sa Toledo, nitahan alas 12:30 Huwebes sa udto.
Si Ombao gikombikto sa kasong rape ug nasulod sa New Bilibid Prisons niadtong Nobiyembre 13,2013 ug nakapahimus sa GCTA niadtong Hulyo.
Ang laing nitahan mao si Martiniano Labajo, 53, taga Barangay General Climaco.
Si P/Ssgt. Reyno Allego sa Toledo Police Station niingonnga alas 10:30 Huwebes sa gabii nitahan si Labajo. (BBT)