SUPERBALITA CEBU

Lab-as gihapon ang panghitabo

HUGKAS: Mga kabanay sa mga nangamatay sa landslide sa Dakbayan sa Naga nanagkot sa mga lubong sa ilang mga mahal sa kinabuhi tangkod og usa ka tuig human sa trahedya. (Alex Badayos)

BISAN tangkod usa ka tuig nang nahitabo ang landslide sa Dakbayan sa Naga nga nipatay og 78 ka mga tawo ug pagka-missing sa unom, nagpabilin ang kasakit sa paghandom sa hitabo.

Bisan tangkod nang usa ka tuig sa Biyernes, Septiyembre 20, lab-as pa sa panumduman ni Isaias Macalinao ang pagkamatay sa iyang unom ka mga kabanay atol sa landslide.

Iyang nakita nga susama og dagat ang pagdahili sa bukid sa Upper Sindulan padung sa kabalayan.

Matod ni Macalinao, lumad nga taga Purok 3, sitio Sindulan, Barangay Tinaan, Siyudad sa Naga, duha ka oras nalang unta sa di pa siya mo-out sa iyang trabaho isip traffic officer sa Apo Cement, kay graveyard siya na-assign niadtong tungura, sa dihang nahitabo ang pagdahili sa yuta.

Pasado alas 5 nahitabo ang insedente, hinungdan nga wala na niya gihuman ang trabaho.

Nidali siya sa pagpauli, swerte nga diha sa likud sa ilang balay kutob ang pagdahili sa yuta hinungdan nga nakalingkawas ang iyang asawa ug usa ka anak.

Apan ang iyang mga paryente nga anaa sa ilang likod, lakip na ang mga pag-umangkon nga sila Bianca ug Michael Bersales, kinsa na-retrieve ang mga lawas nga naggakos pa, lakip sa nalubong.

Uban sa natabunan ang iyang tulo pa ka mga pag-umangkon ug ig-agaw ni Macalinao.

Sakit pa usab alang kang Merlyn Lopez nga ang 17 niya ka mga paryente nga suod pa nila nga mao ang pamilyang Campanilla, nahurot sa pagkalubong.

“Manlimbawot gihapon akong mga balahibo kon dumdumon namo ang panghitabo, Kanang sa pagtuo nimo nga sa TV lang makita, mahitabo gyud diay sa tinuod. Lisod unta nga tuohan, pero nahitabo man gyud. Nadawat na, pero sakit pa gyud,” saysay ni Macalinao.

Gihimo ang mga nobenaryo alang sa mga kalag, sugod pa lang niadtong Septiyembre 11 ug gitapos kagahapon, Septiyembre 20, diha sa usa ka parte sa ground zero.

Usa ka santos nga misa gihimo alas 4 sa hapon ug laing santos nga misa sa Naga City hall, alas 7:30 sa buntag. Nihimo usab og dungan nga pagduaw sa gilubngan sa mga namatay.

Aduna usay ginagmay nga salo-salo ang mga lumolupyo ug kabanay sa sitio Sindulan agig paghandum sa unang death anniversary sa kamatayon sa ilang mga kabanay.



Wa mapahimutang

Apan kon sa ilang paghulagway nahimutang na ang mga kalag sa namatay sa landslide, alang sa pipila sa mga survivor nga silang mga buhi wala pa.

Sila si Macalinao ug Tinaan barangay konsehal Ferlino Panilag ang pipila sa mga nipili nga mangabang og balay kay sa mobalik sa kon asa ang ilang balay sa ground zero.

Ang pamilya ni Macalinao nag-abang og P2,600 ang buwan ug nanawagan nga unta mapadali na ang gisaad nga kabalhinan nila. Apan alang kang Panilag nga tinguha niya nga mapadali na ang clearing sa nidahili nga yuta aron mapatukod niya pagbalik ang naguba niya nga balay.

Ang Kagamhanan sa Siyudad sa Naga adunay proyektong pabalay diha ra usab sa Tinaan alang sa mga nabiling biktima.

Atol sa kalihukan sa City hall Byernes sa buntag, nitunol og P3 milyones nga hinabang si Gobernador Gwendolyn Garcia ngadto kang Acting Mayor Kristine Vanessa Chiong aron dugang magamit alang niini.

Gisubhan na usab sayo ning bulana ang ipatukod sa national government nga mga pabalay, alang gihapon sa mga biktima sa Naga landslide diha sa Balili property.

Mismo si Presidente Rodrigo Duterte ang nangulo sa ground breaking.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph