NORTH COTABATO -- Hingpit nang gipasakaan og kasong pagpatay ang tulo nga mga suspek sa pagpatay kay Eduardo Dizon, news anchor sa Brigada News FM sa Kidapawan City.
Gipasaka ang kaso niadtong Miyerkules, Septiyembre 18, dungan sa panagpulong sa Presidential Task Force on Media Security (PTFoMS) Member-Agencies and Media Observers sa palasyo, sumala ni Undersecretary Joel Sy Egco, executive director sa PTFoMS.
Si Mariam April Mastura-Linsangan, acting city prosecutor sa Kidapawan City, nagsang-at sa kasong pagpatay batok sa mga suspek sa Kidapawan City Regional Trial Court (RTC) nga dunay Criminal Case 5281-2019.
Gisang-at ang kaso batok kanila ni Junell Jane Andagkit Poten, alyas Junell Gerozaga; Sotero Jacolbe Jr., alyas Jun Jacolbe; ug Dante Encarnacion Tabusares, alyas Bong Encarnacion.
Sila Tabusares ug Jacolbe pulos mga sakop sa media sa Kidapawan City.
Ang krimen sa pagpatay gitumbok ug gisilutan ubos sa Artikulo 248 sa Revised Penal Code.
Ang tulo giingong nagkunsabo aron patyon si Dizon ug gipusil sa makadaghang higayon kaniadtong Hulyo 10.
Matud ni Mastura-Linsangan, sa inisyal niining imbestigasyon ug personal nga gisusi si Madonna Dizon, asawa sa biktima ug ang punoan sa nagreklamo lakip na ang iyang mga testigo, nakaplagan nga dunay igong ebidensiya aron nga pasakaan og kaso ang mga nahisgutan.
Giasoy sab ni City Prosecutor Mastura-Linsangan nga ang suspek nga si Gerozaga, giingong maoy mipusil sa biktima, niduso og Motion for Extension of Time aron nga makasumite og Counter-Affidavit apan pakyas siya.
"Ito ay isang patunay na gumagalaw ang katarungan sa pagpatay kay Dizon," pagklaro ni Presidential Communications Office (PCOO) Secretary Si Martin Andanar, kinsa mao say co-chair sa PTFoMS.
Gidugang ni Andanar nga wala'y hunong ang gobyerno ni Presidente Rodrigo Duterte sa paggukod sa mga suspek sa pagpatay sa mga sakop sa media.
"We at the Task Force are enforcing a direct order from the President, that is, to go after the evil-doers behind these criminal acts against media men without fear or favor -- as there are no sacred cows in this administration," pagklaro niya.
Apan, lain pang usa sa mga suspek sa kaso nga si Hilario Cavan Lapi Jr. gidawat sa Witness Protection Program (WPP) ug gihatagan sab og WPP Certificate of Admission sa Department of Justice.
Si Lapi giingong nahimong "lookout" sa dihang gipatay sa mga suspek si Dizon, samtang nagsakay siya sa iyang awto paingon sa iyang balay.
Ang city prosecutor pabor sa WPP Certification, busa si Lapi wala nahilakip sa mga kasong kriminal nga gipasaka batok sa tulo tungod kay magsilbi siyang saksi.
Hinuon, sila si Tabusares ug Jacolbe kusganong nanghimakak sa mga alegasyon nga naglambigit kanila sa pagpatay kang Dizon ug andam nilang atubangon ang kaso sa korte. (Edgar E. Fuerzas)