DIGOS CITY -- Hingpit nang giduso sa National Bureau of Investigation (NBI)-Davao ang tulo ka mga kaso batok ni Davao del Sur Board Member ug brodkaster nga si Arvin Malaza, alyas Jun Blanco, human sa alegasyong nalambigit sa pagbalik sa operasyon sa Kapa Worldwide Association, kanhi Kapa Community Ministry International Inc.
Si NBI-Davao spokesperson Special Investigator Joel Ayop nagbutyag nga kasong paglapas sa Republic Act 8799 o Securities Regulation Code, large-scale syndicated estafa ug illegal possession of firearms ang giatubang sa bokal didto sa Davao del Sur Provincial Prosecutor's Office, alas 2:30 sa hapon Huwebes, Septiyembre 19.
Si Malaza, kuyog ang pito ka kaubanan, nasikop atol sa gipahigayong entrapment operation sud sa gipanag-iyahang radio station sa dakbayan niadtong Miyerkules sa hapon.
Sumala sa NBI-Davao, nahitabo ang operasyon human ilang nakompirma nga nibalik ang operasyon sa Kapa.
Gitudlo sa NBI nga si Malaza mao ang media officer sa Kapa kinsa nag-operate bisan og way pertinenteng dokumento.
Sa wa pa mahitabo ang operasyon, aduna nay tawo ang NBI nga gipadala aron "mo-pay in" gamit ang marked money nga P10,000 ug didto na gisikop si Malaza ug ubang anaa sud sa istasyon.
Gibutyag sab ni Ayop nga sa wa pa mahitabo ang entrapment, nakahimo na ang ilang asset "pag-pay in" og kantidad P30,000 aron maseguro nga adunay nahitabong transaksiyon.
Gidason sa NBI nga nakuha sa istasyon ni Malaza ang marked money nga
P10,000, identipikasyon sa miyembro sa Kapa, ledger, books of account, usa ka shotgun nga adunay unod nga upat ka buhing bala, ug uban pang ebidensiya.
Human naduso ang kaso, gibiyahe na pagbalik sa Davao City ang grupo ni Malaza aron didto ikustudiya sa buhatan sa NBI-Davao. (Orlando B. Dinoy)