NAGHANYAG si Mayor Sara Duterte-Carpio og P300,000 nga ganti sa mga tawo nga makahatag og impormasyon alang sa pagkadakop sa unom ka mga suspek nga naglugos ug nagpatay sa 4-anyos nga bata sa Barangay Tapak Proper, Paquibato District, Davao City.
Matag ulo sa unom ka mga suspek dunay patong nga tag P50,000.
Nahitabo ang niluog nga krimen niadtong ala 1 sa kaadlawon, Agosto 29, kon diin ang biktima nga 4-anyos nga babaye, kinsa molupyo sa Sitio Mangani sa maong barangay, nakaplagang patay na ug hubo ang kalawasan sa kasagbutan nga bahin sa maong dapit.
Subay sa gihimong follow-up investigation sa kapulisan sa Paquibato Police Station pangulohan sa ilang station commander, Police Major Montecillio, sa pakig-alayon sa mga barangay opisyal ug sa Philippine National Police (PNP) Forensic Investigators kinsa naglusad og otopsiya sa patay nga lawas sa biktima, nakompirma nga ang bata niluog nga gilugos una gipatay sa mga mapintas nga mga suspek.
Kini base sab sa saysay sa mga saksi sa insidente nga maoy nakatudlo sa krimen ug positibong pag-ila sa mga suspek nga sila Steve Allan, Jerome Bang Gaan, Jorex Manlangan, Mayonado Calibay, Jomar Cariaman, ug John Onsilag, pulos molupyo sa Barangay Tapak Proper sa maong distrito.
Gipasaka na ang kasong rape with homicide sa City Prosecutor's Office batok sa mga suspek pinaagi sa regular filing procedures, samtang ang mga suspek nagpabilin pang gawasnon human nga daling nisibat gikan sa ilang barangay human sa krimen.
Sa kasamtangan, giukoy na sa Intelligence Group sa Paquibato police ang mga suspek aron nga matumbok ang ilang nahimutangan ug madakpan. (WGM)