MONTEVISTA, Compostela Valley -- Natugaw ang kabuntagon sa kombati sa duha ka giingong guest relation officer (GRO) nga nagbangi gumikan sa hinayhay nga panty sa Barangay Poblacion alas 6:30 sa buntag, Huwebes, Septiyembre 19.
Ang biktima, alyas Joana, 24, nagtrabaho isip GRO, nakahiagom og labhag sa bukton human gihapak og palo-palo sa gikabangi niyang kauban sab sa trabaho nga gitago sa pangalang Maria, 25, parehong molupyo sa Barangay Poblacion sa maong lungsod.
Saysay ni Jane nga sa ilang pag-uli ni Joana gikan sa trabaho, maoy naabtan nila ang ka-boardmate ug kauban ra sab sa trabaho nga si Maria nga niadtong higayona wa nitrabaho ug nanghayhay sa mga nilabhang panty.
Apan namatikdan ni Joana nga tulo sa mga panty nga gihayhay ni Maria mao ang nawala niyang mga panty.
Gikompronta ni Joana si Maria, apan nasuko ang naulahi ug miingon nga iya ang maong mga panty ug gipakita ang gamay buslot sa usa sa mga panty nga maoy timailhan nga dugay na niya kining gigamit.
Apan, hugot nga miinsister si Joana nga iya gayud ang maong mga panty, hinungdan nga nahitabo ang panagbangi ug nahapakan og palo-palo ni Maria ang bukton niya.
Mipatunga gilayon ang kapuyo ni Maria ug giuwang ang duruha, hinungdan nga napakgang ang maong away.
Nakatakdang mag-abot sa barangay ang duruha, apan buot sa kapuyo ni Maria nga sila-sila na lang ang maghusay aron dili na modako pa ang wala pagkasinabtanay.