MOABOT sa 2,000 ka mga tawo ang wa nay kapasilungan human gipangguba ang ilegal nga gitukod nga mga balay daplin sa Mahiga creek sa Dakbayan sa Mandaue.
Pagtuman kini ni Mandaue City Mayor Jonas Cortes sa iyang saad nga hawanan ang Mahiga Creek atol sa ilang panagtagbo ni Cebu City Mayor Edgardo Labella sa massive clean-up drive niadtong Sabado, Septiyembre 14.
Gisugdan pagguba sa mga sakop sa Housing Urban Development Office (HUDO) ang 54 ka mga estuktura ug barung-barong duol sa sapa sa Biyernes sa buntag, Septiyembre 20, 2019.
Pipila sa mga mulopyo way nahimo, igo na lang sa paghilak ug pagtabang sa paglangkat sa ilang barung-barong.
Matod sa pangu sa HUDO demolition team, Cesar Ylanan, pito ka tuig nang gisuwayan pagpapahawa sa lugar ang mga lumolupyo apan nagmagahi.
Pagpasabot sa HUDO, mituman lang sila sa mando ni Presidente Rodrigo Duterte sa paghawan sa dapit tungod usab sa proyekto sa Department of Public Works and Highways (DPWH) pagtabang nga makaginhawa ang agianan sa tubig.
“Kapito na ta nag-demolish ani dapita, kay tungod sa project sa DPWH dinhi sama aning pagtaod. Maglisod man ang mga ekipo sa pagtrabaho kon naa ni sila. Unya delikado man kon naa ni sila, mangaigo sila,” pasabot ni Ylanan.
Una nang miluwat og pamahayag sa hugot nga desisyon si Cortes sa pagpapahawa sa mga mulopyo sa dapit tungod kay gawas nga ilegal, delikado usab kini.
Dugang pa niya nga gitanyagan na usab ang mao nga mga tawo kaniadto oug kabalhinan nga anaa sa brgy. Paknaan ingon man financial assistance gikan sa Dakbayan.
Gipahibawo
Saysay ni City Legal Officer, Atty. Hyacinth Gillamac-Tan nga gipadad-an na og notice sa Siyudad ang tanang mga mulopyo hinungdan nga wala sila’y angay nga ikamahay kanila.
“Ilegal man gud na sila diha unya, gitagsa tagsa gyud na namo og adto ang balay paghatag og notice”, matod ni Tan.
Sa ilang bahin, ang mga lumolupyo mitataw nga bahaan ang gihatag sa Siyudad nga relocation area hinungdan nga di sila mopuyo sa dapit.
Si Joy Lozano nga usa sa apektado nahimong emosyonal sa pagguba.
“Ang amoa balay nalang gyud unta na. Kon naa may kabalhinan, wala man gyud nay problema basta naa lang mi kapuy-an. Dili man mi ganahan didto (relocation site) kay bahaan man gud to didto”, matod ni Lozano.
Sa clean-up drive niadtong Sabado, nakasaway ang mga mayor sa nag ung-ong nga mga basura hinungdan nga maoy gitumbok nila sa dali nga pagsaka sa baha hinungdan sa pag-awhag ni Cortes ug Labella sa kanunay nga paghinlo sa sapa.
Septic Tank
Nisaad nga mohimo og septic tank ang 120 ka mga tag-iya og balay nga nagpuyo sa Mahiga Creek sa habig sa Dakbayan sa Sugbo.
Ang ilang hugaw modiretos sa sapa hinungdan nga sila giisyohan og citation ticket sa Cebu City Environment and Natural Resources Office.
Kini ang gibutyag ni Atty. Jigo Dacua, pangulo sa CCENRO, human niadto sa iyang buhatan ang mga lumolupyo para magpatabang.
Ang mga apektado makig-alayon sa ilang mga barangay diin sila nagpuyo sama sa Barangay Banilad, Kasambagan ug Mabolo.
Ang 120 ka balay mao ang nakita sa CCENRO nga nakalapas sa Septage Law atol sa ilang gipahigayon nga clearing operation niadtong Septiyembre 14 sa Mahiga creek.