NAGLARAW ang Samahang Basketbol ng Pilipinas (SBP) nga magkuha og dekalidad nga coaching staff ug mga magduduwa nga hashasan og insakto sa international basketball alang sa pagpangandam niini sa 2023 Fiba World Cup.
Ang national pool hatagan sa tanang kinahanglanon niini aron mahashasan og insakto ang abilidad ug makaparang na’g insakto sa international basketball.
Sila si SBP chairman emeritus Manny V. Pangilinan ug president Al Panlilio nagsugod na og konsultasyon sa mga mayorihiyang stakeholders alang sa long term nga programa.
Tinguha sa SBP nga makabawi gikan sa mangil-ad niining kampanya sa miaging 2019 FIBA World Cup sa China diin nangiwit ang Pilipinas sa 32-team tournament nga wala’y daog sulod sa lima ka mga duwa.
Lakip sa gitutokan og insakto sa SBP mao ang pagpili sa mga magduduwa nga molangkob sa Gilas Pilipinas nga mokombati sa 2023 World Cup diin usa ang Pilipinas sa mga host kauban ang Indonesia ug Japan.
Gipasalig nila ni Pangilinan ug Panlilio nga ang mga molangkob sa bag-ong Gilas Pilipinas hatagan sa tanan niining kinahanglanon hilabi na ang exposure sa international basketball nga maoy kuwang sa Gilas Pilipinas nga ningkampanya sa miaging World Cup.
“I told Al [the program] will not just be for 2023 [World Cup] but beyond that. Ano naman, in our lifetime, we won’t see the Philippines become a world champion. But at least, with every World Cup we participate in, that should be our norm,” pamahayag ni Pangilinan nga napatik sa Spin.ph.
Gipasabot ni Pangilinan nga kinahanglang mosaka pa ang world ranking sa Gilas Pilipinas.
“Our ranking should improve, our performance should improve in the World Cup, even if incremental lang,” pasabot ni Pangilinan.
“When we started in 2007, we were No. 64 [sa Fiba rankings] yata. Now we’re down to 31, which is good. Slow progress ‘yan. But at least we’re improving.”
Lakip sa mga gitutokan og maayo sa SBP mao ang pag-umol og insakto sa abilidad sa mga sakop sa Batang Gilas nga sila si AJ Edu, Carl Tamayo, 7’2” Kai Sotto, ug Dave Ildefonso nga mao ang giingong kaugmaon sa basketball sa Pilipinas.
Sa sayo pa, si Panlilio nagtinguha nga mokuha og European coach aron ihulip kang Yeng Guiao, kinsa miluwat sa iyang katungdanan isip head coach sa Gilas Pilipinas.
Apan ning puntoha, naglaraw ang SBP nga ang multi-titled coach sa Philippine Basketball Association (PBA) nga si Tim Cone maoy ilaha unang kuhaon alang sa kampanya sa Gilas Pilipinas sa umaabot nga SEA Games. (ESL)