SunStar lead designer midaog sa Press Freedom Trail Run

PRESS FREEDOM: Nagpahulagway ang top three winners (naay medalya) sa Press Freedom Trail Run kagahapon sa Ayala. Naa sab sa hulagway ang pinasidunggang dinapit sa kalihukan nga si PBA legend ug Cebu city councilor Dondon Hontiveros (3rd. L-R), Superbalita Cebu editor-in-chief Michelle So, 4th, L-R) ug organizer Allan Choachoy (1st, L-R). (Alan Tangcawan)
PRESS FREEDOM: Nagpahulagway ang top three winners (naay medalya) sa Press Freedom Trail Run kagahapon sa Ayala. Naa sab sa hulagway ang pinasidunggang dinapit sa kalihukan nga si PBA legend ug Cebu city councilor Dondon Hontiveros (3rd. L-R), Superbalita Cebu editor-in-chief Michelle So, 4th, L-R) ug organizer Allan Choachoy (1st, L-R). (Alan Tangcawan)

GIGAMIT ni Veronika Hipolito, lead designer sa SunStar Publishing Inc., ang iyang kakusog modagan ug abilidad sa puzzle problem solving aron angkunon ang overall title sa Press Freedom Trail Run 2019 kagahapon sa Cebu Holdings Ayala.

Si Hipolito, 30, milupig dili lang sa sama niyang babayeng mga partsipante kon dili hasta sa mga lalaki niyang kaparang ning maong fun run nga gilakipan og laing klase sa panagtigi.

Ang mga partisipante miagi og sprint run nga adunay unom ka obstacles nga mao ang Fake News, Chasing the News, Bashers, Freedom of Speech ug Problem Solving.

Sa tanang obstacles, ang Problem Solving mao ang makonsiderar nga labing lisod gumikan kay dinhi nalangan ang mga partisipante.

Apan alang kang Hipolito, yano ra niya ang pagsulbad sa puzzle ug nahuman kini niya nga wala pa’y usa ka minuto.

Gihuman niya ang tanang tahas sulod sa 11 ka mga minutos ug 20.5 segundos aron dag-on ang P3,000 nga ganti.

Nagkanayon si Hipolito nga nakabintaha siya sa puzzle solving gumikan kay mao kini ang iyang kalingawan dihang bata pa siya.

Laing empleyado sa Sun.Star nga si Jeanneta Rose Tamesis maoy miangkon sa ikaduhang dapit samtang naa sa ikatulo ang cameraman sa CCTN nga si Michael Alcoreza.

Ang nahiluna sa ikaupat ngadto sa ika-10 pulos gikan sa Sun.Star. Kini mao sila si graphic artist Rolan John Alberto, Elisar Hayag sa credit and collection department, graphic artist Ariel Itumay, web tech support Frank Felipe, reporter Arvie Veloso, Mildred Buanghog sa accounting department ug web tech support Eric Areglado.

Si Cebu City Councilor ug PBA legend Dondon Hontiveros mitambong sa sporting event, nga usa sa mga kalihukan sa 27th Cebu Press Freedom Week. (RSC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph