MGA duwa karon
12:30 pm- USPF batok UCLM (High School)
2:00 pm- SWU batok USJR (High School)
3:30 pm- CEC batok USC (High School)
5:00 pm- USPF batok CITU (College)
Girehistro sa high school defending champions University of Cebu (UC) Baby Webmasters ang ilang ikatulong sunodsunod nga kadaugan sa samang gidaghanon sa mga duwa pinaagi sa pagbuntog sa Cebu Institute of Technology-University (CIT-U) Wildkittens, 65-60, kagahapon sa 2019 Cesafi basketball tournament sa Cebu Coliseum.
Gikan sa sinugdanan, ang Baby Webmasters nakasugat na og pagpanghudlat gikan sa Wildkittens ug mao kini ang kanunay’ng senaryo hangtod na sa hinapos nga bahin,
Hinuon ningluagluag ang ginhawa sa Baby Webmasters dihang nakapabuto og three-point bomb si Kenyon Pondoc sa nahabiling 33.6 segundos nga naghatag kanila og pito ka mga puntos nga labaw, 65-58.
Human niini, wala na nakabawi ang Wildkittens hangtod na sa pagkapupos sa oras.
Ang kadaugan gipangulohan ni Daniel Lapiz pinaagi sa iyang 16 puntos, lima ka rebounds ug duha ka assists.
Niamot og siyam ka mga puntos si Maczi Micutuan alang sa Baby Webmasters samtang nidugang og unom ka mga puntos, walo ka rebounds ug duha ka assists si Isaiah Blanco.
Ang Wildkittens natagak sa 1-1 nga rekord.
Sa premirong duwa, ang Sacred Heart School-Ateneo de Cebu (SHS-AdC) Magis Eagles ningmakmak sa Don Bosco Technological Center (DBTC) Greywolves, 69-59, sa laing duwa sa high school division.
Nagmangtas si Mike Boniel aron pangulohan ang Magis Eagles pinaagi sa iyang 25 puntos, nidugang og 12 puntos si LA Casinillo samtang niamot og 10 puntos si Ariel Dinglasan.
Ang Magis Eagles ningsaka sa 1-1 nga rekord samtang ang Greywolves nahagbong sa 1-2 nga baraha. (ESL)