BELIBA nako nimo, Gay, uy! Kugihan kaayo kang mamuhat og tableya!” matod ni Remy usa niana ka hapon samtang nagsangag si Panggay sa mga liso sa kakaw aron gam-ong tableya sa kawa nga gitak-ang sa sug-angang bato sa ilang tugkaran.

“Aw, wa man tay laing pangita, Rem, kini ra mang panghimo og tableya,” ni Panggay dayong tayhop sa napawong nga sugnod sa iyang sinangag. Wala lang niya panumbalinga ang nagpuot nga aso nga nakasambol sa iyang panan-aw.

Taudtaod na si Panggay ning iyang panginabuhi. Gani, daghan na siyag suki tungod sa kalamian sa iyang tableya. Gani, nabaniog na ang iyang ngalan sa tibuok Purok Lemonsito, barangay Gun-ob. Kon adunay mingawon og sikwate o sampurado, siya gilayon ang pangitaon.

Apan dili lang sa Gun-ob naila ang ngalan ni Panggay isip mamuhatay og tableya kundili hasta sa silingang mga balangay sa Looc, Canjulao, Basak ug Babag. Tungod sa kahimalitan sa iyang produkto, midugang siyag laing patigayon nga mao ang pagpamuhat og kinilaw o atsara nga kapayas nga nahimo usab nga himalitan.

Ang kinitaan ni Panggay sa maong mga negusyo ang gisaligan sa pagpatungha sa iyang upat ka anak nga sila si Johnrey, Eric, Renalyn ug Raymond. Si Johnrey nga kamaguwangan talitapos na sa hayskol, si Eric segundo anyo na, si Renalyn anaa pa sa ikatulong ang-ang sa elementarya ug ang kamanghuran nga si Raymond grade one pa.

Naningkamot gyud si Panggay kay damgo niya nga makahuman sa pagtuon ang iyang mga anak. Buot niyang ma-propesyonal sila si Johnrey, Eric, Renalyn ug Raymond. Kon walay trabaho si Renan, iyang bana, moabag usab kini kanya pagpanghimo og tableya. Si Renan ang mosangag sa mga liso sa kakaw ug siya ang mohulma sa tableya. May adlaw nga tableya ray buhaton ni Panggay ug may adlaw usab nga atsara ra.

Apan kini laging negusyo aduna man gyuy mangutang hinungdang matag tingsuweldo suruyon ni Panggay ang iyang mga suki aron maningil. Adunay uban nga gahi mobayad pero nagpailob lang siya. Dili lang siya mamugos kon walay ikabayad aron walay away. Dili siya buot nga makakitag kontra aron limpiyo ang iyang konsensiya sa iyang paglibod sa iyang mga produkto.

Niining hapuna nagsangag na usab si Panggay og mga liso sa kakaw samtang si Renan didto sa ilang Rudy-Carmen kay dunay gipanday.

“Diin ka man makakat-on paghimo og tableya, Gay?” sukot ni Remy nga miduol na usab kanya. Suod man god niyang silingan si Remy nga usa usab ka sulundong asawa hinungdang wala gyud molubad ang gugma ni John kaniya.

“Sa akong inahan, Rem. Mamuhatay man usab siya niadto og tableya ug atsara.”

“Tabangan tika, Gay, bi. Ako lay sangag diha aron mahinay-hinayan mog panit ang mga nasangag na.”

Miuyon usab si Panggay sa tanyag ni Remy kay sa iyang hunahuna, tagaan lang niyag tableya ang iyang amiga.

Saksi si Remy sa paningkamot ni Panggay nga makab-ot ang pangandoy nga makatapos sa pagtuon ang iyang mga anak. Hilom siyang nanghinaot nga matuman ang mga pangindahay sa suod niyang silingan sa Purok Lemonsito.

Ug tuod man, sa pagpanglabay sa katuigan, nakalampos gyud ang iyang mga anak. Usa na ka enhinyero si Johnrey, si Eric usa na ka CPA, si Renalyn registered nurse na ug piloto na pod si Raymond. (KATAPUSAN)