KON akong basehan ang akong makita sa Facebook, daghan karon sa mga mountain biker ang nag-off road kay gipangpul-an na sa sementadong mga karsada sa kabukiran. Wa na sila malingaw sa pakusganay sa pagtungas. Mas nalingaw sila sa mga single track.
Ang ako bitaw mga kauban sa Talamban ug Bacayan, manuot na sa mga kalibunan. Bag-o ra sab ko nakasuway og off road pinaagi sa akong higalang si Wendel “Phukey” Valeriano. Nalingaw ko pero naabtan ko og bikog sa saka kanaug sa biseklita sa mga rota nga among gisubay.
Duol ra ang among rota, but maorag layo tungod kay nagliyokliyok ra mi sa mga bungtod sa Cebu City, Mandaue ug Consolacion. Kon ratulon ka pareho nako, gikinahanglan nimo ang practice para mind conditioning. Yes, mind conditioning gikinahanglan ingon pa sa mga cycling experts kay kon wa ka sa maayong mental state, kuyaw ka madisgrasya.
Ako dunay panahon nga kondisyon akong mind sa pagdulhog mao usahay makapaspas ko but sa kadaghan ron sa mga sakyanan nga nagsaoy saoy sa kabukiran, mas maayong mag extra careful. Laing bantayanan sab kining mga iro kay hapit ko madisgrasya dihang nahug ang iro sa kimba ug diri nitugpa sa akong atubangan samtang gadulhog ko.
Anad na
Kasagaran sa akong mga kauban dugay na kaayo sa mountain biking mao nga wa na kaayoy challenge alang nila ang sementadong mga karsada. Kini ra bang trail riding gikinahanglan ang technical nga kahibawo nimo aron paglikay sa disgrasya.
Usa sa akong nakat-unan sa off road mao ang di kaayo magpalabi sa pag-apply og brake ug go slow. Hinay ang pagdulhog ug igo-igoa lang ang pressure sa brake sa likod samtang abag ra ang atubangan nga brake. Kon medyo kusog ra unya mo-apply ka pag grabeng pressure sa brakes, anha na diha ang disgrasya.
Nahinumdom lagi ko atong among nasundan sa akong mga kauban sa Sunstar nga nagdulhog nga natulimbang ug dako kaayo ang samad sa agtang. Gipaspasan niya ang pagdulhog kay niapas sa iyang mga kauban, apan kay naratol man siya, na outbalance siya pag-brake sa biseklita.
Skill
Ingon sa usa ka expert mountain biker, gikinahanglan ang conditioned mind ug technical skill sa bike handling magkuyog aron malikay ka sa disgrasya o mas lesser ang chance sa aksidente. Gawas aning duha, importante usab ang familiarity sa terrain kun rota. Mas maayong dunay suhito sa rota kay nasayod siya kon asang dapita ang grabe ka technical.
Usa ang labing maayong buhaton sa grupo nga mag-trail, pagdala og first aid kit kay di matag-an, nagkinahanglan diay niini, labina kon suoton ug layo ang lugar sa main road. Mas maayong managana.