MALIPAYON ang aktor nga si Ejay Falcon kay ang iyang gipasigarbong teleserye makita na nato sa Kapamilya gold isip hulip sa naghinapos nga “Los Bastardos” nilang Jake Cuenca, Albie Casiño, Marco Gumabao ug Ronaldo Valdez.
Dinhi sa seryeng “Sandugo” mapakita na usab sa aktor ang iyang pagka-action star, duna’y drama ug pang-pamilya pa.
Gikan sa Dreamscape production nga mao usab ang nagpaluyo sa nag-hinapos nga seryeng “The General’s Daughter” ni Angel Locsin.
Makauban ni Ejay Falcon silang Aljur Abrenica ug Elisse Joson. Naa usab silang Vina Morales, Cherry Pie Picache, Gardo Verzosa, Ariel Rivera ug Jessy Mendiola.
Gumikan sa usa ka trahedya namatay ang anak ni Vina ug tungod sa kalisod nabaligya sa inahang si Cherry Pie ang iyang usa ka anak.
Sa trailer atong masabtan nga magsoon dinhi silang Ejay ug Aljur apan nahipunta sa laing pamilya ang usa kanila. Kon ngano ug kon unsang mga kasungian ang ilang mahisum-okan? Mao kini ang atong sundan sa “Sandugo” matag hapon sa Kapamilya network. Ato usab totokan ang katapusang semana sa “Los Bastardos.” Ay’g saba!
May bag-ong pelikula ang Regal Entertainment Inc. “Ang Henerasyong Sumuko sa Love” nilang Tony Labrusca, Jane Oineza, Albie Casiño, Jerome Ponce ug Myrtle Sarrosa, sa direksyon ni Jason Paul Laxamana.
Usa ka trying hard nga social media adik si Jane nga mahilambigit sa problemadong si Tony Labrusca. Magkapartner usab dinhi silang Albie Casiño ug Myrtle Sarrosa ug may mga init nga eksena ang duha.
Si Jerome Ponce sa unang higayon bading ang papel ug may lalaki siyang ma-uyab apan may lain siyang magustohan. Na-intriga ko sa gipakitang trailer kon unsay mahimong kalambigitan sa bulalakaw nga nasaksihan nilang mihagsa sa kalibotan? Ay’g saba!