SUPERBALITA CEBU

Diola: Manoy ug Manang

Mao diay

Binasi sa Amos 8:4-7; Salmo 113; 1 Timoteo 2:1-8; Lucas 16:10-13

MANOY” ako kay kamagulangan ako sa walo ka mga managsuon. Usa sa mga labing makahuloganon nga yugto sa akong kinabuhi nahitabo sa nagpanuigon ako og pito ka tuig. Naanad mi sa akong mga manghod nga mokaon sa gamay nga lamesa samtang among ginikanan sa dako. Usa ka adlaw niana gitawag ug gipalingkod ako sa akong ginikanan nga mokaon uban nila. Mapasigarbuhong kalipay ang akong gibati.

Sagad seryosohon kaming mga manoy ug mga manang. Istriktuhon ug palasugo sad. Gagmay pa man god mi, tahasan na dayon sa ginikanan sa pagbantay sa mga manghod. Kon akoy pasultion ang panultihon nga molarawan kanamo mao ang usa ka linya gikan sa atong ebanghelyo: “Ang matinud-anon sa labing gamay, matinud-anon usab sa labing dako; ug ang dili matarong sa labing gamay dili usab matarong sa labing dako”.

Dili angay dalidalion ang paghatag og katungdanan. Kinahanglan masabtan usa ang maong katungdanan. Kinahanglan usab matun-an ug mabansay usa ang kahanas nga gikinahanglan. Kon ihansak dayon ang katungdanan sa tawo, daghang sayop. Labaw sa tanan, gikinahanglan ang hiyas sa pagkamatinud-anon nga, sumala pa sa ebanghelyo, hinayhinay matagamtaman. Sulayan usa pinaagi sa mga gagmayng butang.

Lisod pangitaon niining mga panahona ang hiyas sa pagkamatinud-anon. Daghang makadani halayo niini. Usa sa makadani mao ang kahakog nga gihisgotan ni propeta Amos. Gikondenar niya ang mga tigpatigayon nga manikas sa timbang ug mamaligya sa iglalabay nga trigo. Miingon ang Dios: “Dili gayod nako kalimtan ang bisan usa ka butang nga ilang gihimo!” Kasuko sa Dios ang maani sa mga manikas batok sa mga kabos.

Ang gipangita sa Dios mao ang pangaliya alang sa “mga hari ug sa tanan nga anaa sa awtoridad, aron kita mopuyo og kinabuhi nga mahilom ug malinawon diha sa tanang debosyon ug dignidad”. Mangaliya kita alang kanila kay, sumala pa ni San Pablo, ang mikupot og gahom gibutang diha sa Dios alang sa kaayohan.

Kon ilambigit ni nato sa atong gihisgotan mahitungod sa hiyas sa pagkamatinud-anon, ang anaa sa poder gibutang diha aron mapahigayon ug mapalambo ang kultura sa pagkamatinud-anon. Dakpon ang manikas ug mamintaha. Sakit lang paminawon nga may mga ang gihatagan og poder sa pagpalambo sa pagkamatinud-anon mao na hinuoy mag-una sa kabuang.

Kinahanglan tingali nga duawon nato pag-usab ang atong katilingbanon ug kulturanhong pagsabot sa mga pulong “manang” ug “manoy”. Kinahanglan puy-an nato ang kahulogan niini nga mao ang pagpahigayon sa kaayohan sa han-ay ug kaayohan komun. Kini magsugod sa hiyas sa pagkamatinud-anon.

Kumusta kamong mga manoy ug manang?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph