SUPERBALITA CEBU

Mongaya: Balaod Militar

Panahom

MGA 33 na ka tuig ang milabay sukad napahugno sa katawhang Pilipino ang diktadurya ni Marcos ug 47 ka tuig sukad sa proklamasyon sa balaod military kaniadtong 1972. Apan daw mibalik ang pagpanghadlok nga nipatigbabaw kaniadtong panahon sa diktador.

Dihang nagtungha ko sa USC-TC mga 1979, makahinumdom pa ko nga nagyaka mi sa bailli nga nag-alirong sa football field aron istoryahan ang pagpetisyon batok sa plano sa unibersidad nga mopasaka sa tuition.

Lakip sa among nahisgutan mao ang kahadlok. Wa mi mahadlok nga mopirma og petisyon kay kuno makaila hinuon kanamo ang mga pari. Among nahisgutan ang kahadlok sa mga tinun-an nga ma-a-an nga mga aktibista ug rebelde kay ubos lagi ang nasud sa balaod militar.

Di man pareho karon ang kalanog sa mga akusasyon nga dunay mga rebelde nga nangrekrut og menor de edad sulod mismo sa mga tunghaan, apan niadtong tungora sa 1979, makahinumdom pa ko sa kahadlok nga mopetisyon batok sa pagsaka sa tuition.

Mao nga hilom namong gi-apod-apod sa barkada ang petisyon aron papirmahan sa among batch.

Apan paspas nga nikatag ang maong petisyon. Sa ikaduhang adlaw, akong nakaistorya ang usa ka student leader nga 3rd year ug niingon siya, nganong di man kini hisgutan atol sa ilang assembly sa department?

Ang maong kalamboan nakapadasig kanamo ug sulod lang sa pipila ka adlaw, niabot na kami og kapin sa 3,000 ka pirma sa tibuok Talamban campus. Niining tungora, dunay hilom nga niduol kanako nga mga student leader sa USC Main Campus lakip ang usa ka seminarian (nga pari na karon) kay motabang.

Nausab ang plano sa taga-Main campus nga magtago-tago sa pagpapirma dihang nakita nila ang kadaghanon sa among nakuhang mga pirma ug anha gani sa corridor mag-solicit og mga pirma.

Tuod man, baga-baga gyud ang envelop nga puno sa mga pirma sa among petisyon dihang amo kining gisumiter sa batan-on pa nga Fr. Rod Salazar.

Wa man kami makapugong sa pagsaka sa tuition, apan natanom namo ang ideya nga gikinahanglan ang usa ka student government aron maoy mamuno sa pagpanalipod sa katungod sa mga tinun-an.

Human sa pipila ka tuig nga kampanya, lakip ang pipila ka boycott sulod sa unibersidad, natukod ang Supreme Student Government dihang naghari pa ang balaod militar ug mapasigarbuhon ko nga moingon nga naa gihapon kini hangtod karon.

Naghisgot ko niini karon kay aktibo na sab nga giduso ang panghunahuna nga kining pagsalmot sa mga tinun-an og mga protesta tipik na sa pagrekrut kanila nga mahimong rebelde.

Kon tinuod pa kini, nahurot na unta ang student population kaniadtong panahon sa diktadurya ni Marcos kay nitakas na unta sa kabukiran.

Daw hangtod karon, wala makasabot ang kapulisan ug military nga ang pagyatak sa mga katungod maoy hinungdan sa mga protesta sulod o gawas sa tunghaan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph