GAWAS sa tulo ka mga asawa sa mga personalidad nga kaalyado ni Mayor Edgardo nga gitudlo gyud sa mayor sa posisyon, ang tanang mga asawa sa mga konsihal apil na ang asawa sa mayor gitudlo nga maoy maglangkob sa Parks and Playgrounds Commission. Ang tulo ka mga asawa nga gitudlo sa mayor mao ang asawa ni north congressional candidate Richard Yap nga si Melody nga naa sa tourism commission. Asawa ni kanhi konsihal ug karon South Road Properties (SRP) manager Joey Daluz nga si Shiela Mae nga maoy acting chief sa Department of Manpower Development and Placement (DMDP) ug si Audrey Garganera, asawa ni Konsehal Joel Garganera isip nurse 3 sa Cebu City Medical Center (CCMC).
Ang pagtudlo sa mga asawa sa Parks and Playground Commission aron kuno makatabang sa beautification. Walay gasto ang kagamhanan kanila kay wala silay dawaton nga suweldo o bisan honorarium o allowances. Boluntaryo lang gyud ang ila. Adunay kaugalingong chairman ug mga sakop sa board ang maong commission.
Dili kini mahulog nga nepotism gumikan kay dili man mga paryente sa mayor ug asawa man sila sa mga konsehal. Wala may labot ang mga anak o kabanay. Dili man pod mga regular nga posisyon. Bisan man gani ang mga paryente dili man mahulog sa nepotism basta casual o job order lang ang ilang status.
Kadto bitaw kang kanhi Talisay City Mayor Johnny Delos Reyes nga iyang gipatrabaho ang iyang asawa, mga anak, igsuon ug mga asawa ug uyab sa iyang mga anak, wala man makiha si Johnny gumikan kay mga job order man. Tiaw ba nimo kanang 16 tanan ang gipatrabaho ni Delos Reyes sa City Hall.
Wala man kini problema ba. Apan adunay lay angayan bantayan si Mayor Labella ani kay basin mamahimong ‘influence peddling’ ang ubang mga asawa gumikan kay nagsalig sa gahum o inpluwensiya sa ilang mga bana kay lagi mga konsehal ug gamhanan. Kon adunay dakong proyekto, dili kaha ni sila maglumba og rekomendar sa ilang suod nga mga supplier? Wala kahay maghawud-hawud ani nila? Wala kahay mangumisyon? Mao lang ni bantayanan. (bobbygnalzaro@gmail.com)