DUGAY na kaayo nga hugaw ang kasapaan sa Metro Cebu tungod sa pagpasagad sa mga lumolupyo ug way pakabana sa kagamhanan sa pagpatuman sa balaud. Sud sa daghang katuigan nahimong labayanan sa tanang klase sa hugaw ang kasapaan.
Gisamutan pa kini sa pagbalay, sagad, sa gitawag og informal settlers nga nagpahimus sa dapit kay way tag-iya kay iya kini sa kagamhanan.
Dihang mayor pa si Bise Mayor Michael Rama, iyang gipapahawa ang informal settlers sa Mahiga Creek. Apan gikiha ang mayor pinaagi sa abag sa usa ka tawo sa pulitikanhong kaatbang ni Rama.
Niadtong Biyernes, sa ikapito na nga higayon, gipa-demolish ni Mandaue City Mayor Jonas Cortes ang mga pinuy-anan sa informal settlers sa habig sa Mandaue.
Sagad sa mao nga mga tawo nakadawat na diay og pinansyal nga abag gikan sa Siyudad human gipang-demolish ang ilang mga pinuy-anan nga naa kilid sa sapa.
Apan sa hinayhinay, namalik sa pagpuyo sa dapit ang mao nga mga tawo.
Nakahukom si Cortes sa pagpa-demolish sa mga pinuy-anan human niya makita ang nagtipun-og nga mga basura sa creek.
Ang pangutana, mabuhi pa ba ang Mahiga Creek ug uban pang kasapaan sa Metro Cebu pinaagi lang sa pagpanglimpyo, labina nga gisaulog sa Sabado, Septiyembre 21, ang World River Clean Up Day?
Ang pagpanglimpyo usa lang ka short term nga solution sa paglimpyo sa kasapaan ug kabaybayunan. Ang long term nga solution mao ang higpit nga pagpatuman sa environmental laws nga gikatulgan lang sa kagamhanan, wa gipatuman.
Kon gipatuman pa kini, wa untay mga subdivision, pabrika ug uban pa nga naghimo sa kasapaan nga sangkuanan sa ilang drainage system nga nagdala sa ilang mga hugaw.
Unta, mag-una sa pagpatuman niini ang local government units (LGU) nga utro sab, gipiyungan ang balaud.