Bag-ong traffic scheme sa UN Ave. sugdan karon sa Team

GIMINUSAN sa Traffic Enforcement Agency of Mandaue (TEAM) ang oras sa pag-shutdown sa automated traffic lights aron pagpangandam sa dry-run sa bag-ong traffic scheme sa U.N. Avenue karong adlaw, Septiyembre 22, 2019.

Sama pa ni Florentino Nimor Jr., executive director sa Team, napangitaan nila og paagi ang pagpaminus sa oras nga i-shutdown ang traffic lights sa interseksiyon sa U.N. Avenue kagahapon, Sabado,Septiyembre 21,2019 gikan sa ilang inisyal nga plano nga gikan sa alas 6 sa buntag hangtod sa alas 10 sa gabii ug karon giusab nila ngadto sa alas 10 sa gabii hangtod sa 12 sa kaadlawon.

Gihimo nila kini nga pamaagi aron dli makahatag og perwesiyo ug grabe nga traffic sa mga motorista. Ilang giandam ang mga materyales ug wiring sa di pa sila mag-install sa hardware settings sa mga traffic lights sa interseksiyon sa U.N. Avenue ug D.M Cortes St.

Base sa bag-o nga pamaagi, ang mga motorista nga mobyahe padulong sa amihanang bahin sa Sugbo gikan sa D.M. Cortes St. agi sa Cansaga Bridge ug mu-U-turn sa agianan ilawom sa Marcelo Fernan bridge.

Kon mabalik na sa main road ang mga motorista, mamahimo na silang moliko sa tuo paingon sa Cansaga Bridge, inay motabok sa intersection nga makamugna og trapik.

Ang mopaingon sa siyudad nga gikan sa Cansaga Bridge, kinahanglang moliko paingon sa tuo moagi sa U. N. Ave. ug dayon sa P. Burgos St. ug muliko sa wala paingon sa A.C Cortes St. ug mulahos ngadto sa D.M. Cortes St.

Giasumir na ni Nimor nga mahanoy ang mga dalan gikan sa Pacific Mall padulong sa Mactan ug gikan sa Airport paingon siyudad apan aduna gyuy ma-areglo labi sa dalan sa Cansaga Bridge ug P. Burgos St.

“Nanghangyo lang mi sa publiko nga to bear with us nga mapakusog namo ang traffic pero mao na nga naa lagi, compromises muhuot gamay ang highway, affected gyud na siya,” sigon ni Nimor.

Nagmantala sa ilang mga advisory para sa mga motorista ang TEAM, gamit ilang social media accounts ug pagbroadcast sa radyo.

Nagbutang sab sila og mga billboard ug tarpaulin subay sa dalan sa D. M. Cortes St., Cansaga Bridge, direksyon gikan sa Mactan ug sa interseksiyon sa U.N. Ave. Dugang pa ni Nimor nga ang dry run magpadayon sa usa hangtod sa duha ka semana.

Magsugod ang dry run karong adlawa ug magsugod sa mas gamay nga traffic aron makita nila daan ang mga ligas sa mao mga pamaagi sa di pa ang Lunes, nga mao ang peak sa traffic. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph