‘Misuborno’ sa mga pulis gipriso

LAKIP na hinuon sa napriso ang usa ka lalake nga buot unta nga luwason ang iyang mga igsuon ug pag-umangkon gikan sa pagka-priso kay siya nisuborno sa mga pulis sa Talisay City Police Station.

Ang gisikop giila nga si Federico Antig, 43, taga sitio Sambagan, Brgy. Tabunok, Siyudad sa Talisay, Biyernes sa gabii, Septiyembre 20.

Sa tinguha nga dili na ipadayon sa mga pulis ang pagpasaka og kaso batok sa iyang mga kabanay nga nasikop, giingon nga nitunol si Antig og P40,000 sa mga pulis.

Unang nasikop sila si Juanito Antig, 57, ug Teofilo Dejos Antig, 52, mga magulang ni Federico, ug 29 anyos nga si Fernando Mancia Antig.

Nasikop sila sa Talisay City Police, pinangulohan ni Police Captain Nazarino Emia, tungod sa pagpahigayon og ilegal nga sugal sa ilang lugar.

Ang Talisay police nakadawat og pipila na ka sumbong gikan sa nga concerned citizen kalabot sa pagpahigayon sa tulo og ilegal nga swertres, sa ilang dapit. Nihimo og aksyon ang mga pulis ug naaktuhan ang tulo.

Si Federico, sa pagkahibawo sa nahitabo, daling niadto sa police station.

Matod ni Emia nga daling nitunol si Federico og P40,000 nga cash ngadto sa mga pulis.

Kini giingon nga bugti sa pagpalingkawas sa iyang mga igsuon ug pag-umangkon.Gihimo kini sulod sa police station.

Way duha-duha ang Talisay police, gilakip nila sa pagsikop si Federico ug gibalhug sa prisuhan tungod sa suway nga pagsuborno.

Matod ni Emia nga insulto kini nila isip mga pulis.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph