Brake gibasol sa 2 ka mga aksidente

LABING minos 17 ka mga tawo ang nangaangol sa duha ka managlahing mga aksidente sa Sugbo

Pasado alas 8 sa buntag, Sabado, Septiyembre 21, upat ka mga tawo ang na grabehan sa pagkalimbuwad sa usa ka multicab nga dunay 14 ka mga pasahero sa national highway sa Sityo Upper, Barangay Taloot, lungsod sa Argao.

Ang multicab gimaneho ni Bernabe Aballe, 46, taga Barangay Botong, lungsod sa Argao, habagatang Sugbo.

Ang mga sakay sa multicab gikan pa sa bukid sa lungsod aron unta motambong sa anibersaryo sa usa ka micro finance company sa lungsod sa Sibonga.

Apan pag abot sa kurbadahon nga bahin sa Sityo Upper, Barangay Taloot nag-malfunction and brake sa sakyanan hinungdan nga natumba.

Matod ni Police Corporal Ariel Conde, traffic investigator sa Argao Police Station, sigun sa pamahayag sa driver nga sa pagtunob sa iyang brake, wa na kini mopaak.

Nagkarga usab silag utanon nga i-display nila sa gym sa lungsod sa Sibonga.

Ang nagrabehan mao silang Lelia Saguinsa, 62, minyo, taga Barangay Bayabas; Mariel Alcade, 28, taga Botong, Argao nga posibling nabalian sa walang bukton; Angela templa, 50; ug si Aballe.

Balamban

Duha usab ka mga pahinante sa sakyanan nangaangol human mabangga ang usa ka close van daplin sa Transcentral Highway, sakop sa Barangay Cansamoroy, lungsod sa Balamban.

Si P/Cpl. Jairo Pormento, nag-imbestigar sa kaso nga nahinabi sa Superbalita Cebu, niila sa duha ka mga naangol nga sila si Kelvin Matugas, 26, taga Leyte ug Christian Toma, 29, taga dakbayan sa Lapu Lapu.

Sa imbestigasyon sa kapulisan nasuta nga pasado alas 11 sa buntag sa Sabado, Septiyembre, 20, ang van nga gimaneho ni D-Rudy Bandojo, 57, taga Labogon, Dakbayan sa Mandaue, nawad-an og brake. (AYB & BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph