GIHANDOM: Niadtong Biyernes, Septiyembre 20, 2019, gihandom ang unang tuig sa kasumaran sa Naga landslide nga nipatay og 78 ka mga tawo. Mga santos nga misa ug paghalad og mga buwak gipahigayon. Niadto usab nga Biyernes niluwat og mando si Naga Acting Mayor Kristine Vanessa Chiong alang sa pagpabakwit sa mga lumolupyo sa unom ka mga sityo kay dunay nabantayan nga bag-ong liki. (Alex Badayos)
GIHANDOM: Niadtong Biyernes, Septiyembre 20, 2019, gihandom ang unang tuig sa kasumaran sa Naga landslide nga nipatay og 78 ka mga tawo. Mga santos nga misa ug paghalad og mga buwak gipahigayon. Niadto usab nga Biyernes niluwat og mando si Naga Acting Mayor Kristine Vanessa Chiong alang sa pagpabakwit sa mga lumolupyo sa unom ka mga sityo kay dunay nabantayan nga bag-ong liki. (Alex Badayos)

400 ka pamilya pabakwiton

DI MOMENOS sa 400 ka pamilya nga namuyo sa unom ka sitio sulod sa unom ka mga bukirang barangay sa Dakbayan sa Naga, habagatang Sugbo gihangyo sa lokal nga kagamhanan nga temporaryong mobakwit human nakit-an ang mga dakong liki sa usa sa mga barangay.

Ang mga liki sa Barangay Naalad nadiskobrehan niadtong Septiyembre 12, mga pito ka adlaw sa dili pa ang unang anibersayo sa pagdahili sa yuta sa Barangay Tina-an nga nikalas og halos 80 ka mga kinabuhi.

Sigon ni City of Naga Acting Mayor Kristine Vanessa Chiong sa pakighinabi sa Superbalita Cebu, nga gihangyo niya mga residente aning apektado nga mga sityo nga mobakwit tungod kay namuyo sila sulod sa “no-habitation zone” nga gi-identify sa Mines and Geosciences Bureau (MGB) Central Visayas nga peligro puy-an human sa landslide sa niaging tuig.

Nagpuyo ang 400 ka mga pamilya sulod sa unom ka sitio nga sakop sa Barangay Inoburan, Tina-an, Naalad, Mainit, Cabungahan ug Uling.

Matod ni Chiong nga bisag gitugtan nila ang 400 ka mga pamilya nga makabalik og puyo sa ilang puy-anan sulod sa “no-habitation zone,” ila na kining gipahimangnoan niadto pa nga kinahanglan sila mangita og laing kabalhinan tungod sa kapeligro sa ilang lugar.

Kasagaran sa 400 ka pamilya nga nibalik og puyo sa “no-habitation zone” kay nakakuha na sa ayuda pinansyal nga gitanyag sa Dakbayan sa Naga, naka-avail na sa gitanyag nga relokasyon o wa nidawat og bisag unsa nga ayuda gikan sa lokal ug nasudnong kagamhanan.

Sigon ni Chiong nga gawas sa dagkong mga liki nga nakit-an sa Barangay Naalad, mas nitaas ang risgo sa pagpuyo sa maong dapit tungod sa gipadayon nga Hazard Reduction Program (HRP) sa Cemex Philippines diha sa Ground Zero ug ang padayong nasinati nga pag-uwan-uwan sukad niadtong Agosto rung tuiga.

Niadtong miaging tuig, ang 400 ka mga pamilya nga namuyo sa “no-habitation zone” sa maong dakbayan gipabalik og puyo sa ilang mga karaang puy-anan samtang naghuwat ang lokal nga kagamhanan sa Siyudad sa Naga nga mahuman ang final delineation of danger zones nga gihimo sa MGB 7.

Hangtud karon, wala pa nakapagawas ang MGB sa ilang final delineation.

Tungod sa mga nakit-ang liki sa Naalad, ni-issue og memorandum si Chiong sa mga sakop sa kapulisan, kabumberohan ug Bureau of Jail Management and Penology (BJMP) nga motabang sa ilang mga sakop sa City Hall nga moduol sa apektadong mga pamilya ug kombinsihon kini nga mobakwit sa luwas nga dapit.

“Nagpatabang nalang mi sa PNP, BJMP ug BFP kay kon kami-kami lang, bundakan lang mi sa pultahan,” sigon ni Chiong.

Nagpatabang na sad si Chiong sa MGB para mo-assess sa mga liki nga nakit-an sa Barangay Naalad ug ang pagmonitor kon naglihok kini o wala.

Sigon ni Chiong sa dihang nahinabi niini ang MGB 7 nga salin sa miaging landslide ang mga liki nga nakit-an sa Naalad ug wala pa nasuta kon unsa ang gilawmon niini.

Pero nirekomendar ang MGB 7 nga ipabakwit ang mga residente nga nagpuyo duol sa lugar kon asa ang mga liki tungod sa kapeligro sa ilang kahimtang.

Related Stories

No stories found.
SunStar Publishing Inc.
www.sunstar.com.ph