MOABOT sa P100,000 ang gibilin nga danyos sa niulbong sunog sa usa ka pribadong compound nga gihimong garahe sa mga trailer trucks ug tambakan sa mga nagamit na nga ligid sa Barangay Cabancalan, Dakbayan sa Mandaue, Dominggo sa buntag, Septiyembre 22, 2019.
Nadawat sa kabomberohan ang alarma sa sunog alas 10:15 sa buntag ug hingpit nga napalong alas 11:03 sa buntag.
Sa pasiunang kasayuran sa kabomberohan giingong may nagdaob og basura sa dapit.
Tungod sa kusog nga huros sa hangin, nikatag kini sa bahin kon asa gitambak ang mga ligid ang usa ka awto ug nakan-an usab ang usa ka primemover nga iya sa Blue Bunny Trucking.
Matod sa mga residente nga matag adlaw may gasunog og basura sa ilang dapit.
Saysay ni Deputy Fire Inspector Kyle Bryan Lauzon nga hugtanon nga gidili sa balaod ang pagdaob ubos sa RA 9003 o ang Ecological Solid Waste Management Act of 2000.
Penalty nga moabot sa P1,000 o mag-atubang og kaso ang masakpan nga nagsunog og basura.
Wala hinuoy mga panimalay nga naamong sa insidente.
Pahimangno sa kabomberohan nga likayan ang pagdaob nga maoy sagad hinungdan sa pagtakud-takod sa kayo. (Superbalita Cebu)