BAGUIO

Luzano: Bilibid… nakiwarkiwaren!

Karit Ken Kayetket

ANAK ti baboy a narape... kas met la nakiwarkiwaren a kua ti nuang dagiti isyu dita bilibid. Imbes a maputeden dagiti rigodon a binnulgaran, saan sa met ta kimmarkaro nga nagkakanat ken nagrarapangen dagiti naibutaktak dita a bangsit kada buyok.

Tsk tsk... abusman ta gumidgiddan ti sumangka-angoten a parikut iti African Swine Fever a nakatayanen ti rinibu a baboy... rumanipak latta met ti imbestigasyon ti Blue Ribbon Committee sadiay Senado.

Kinapudnona... iti pannakaisursurat daytoy a benneg (Sept. 19)... manarimaan pay laeng ti Senate hearing. Ita met nga aldaw ti ultimatum wenno maudi a pawayway ni Pres. Duterte tapno sumuko dagiti nawayawayaan a balud gapu iti Good Conduct Time Allowance (GCTA). Iti nasurok dua ribu a nawayawayaan...dipay gimmuddua dagiti nagsubli. Kayatna a sawen, inton bigat, (Sept. 20) maibilangdan a nagpuga wenno pugante. Ania ngata dagiti sumaganad nga eksena?

***

Nakas-ang ti mabalin a pagtungpalan ti gasat dagiti nawayawayaan a balud (babaen iti GCTA) no dida makamakam ti maudi a kanito ti deadline nga impaulog ni Pres. Duterte. Mabalin a mapasamak ti kunada a “shoot to kill” nangruna ket adda pay inkarin ni Pres. Duterte a reward wenno gunggona a maysa a milyon a pesos tunggal ulo dagiti pugante wenno puga.

Natural no adda kano lumaban wenno agtubngar iti aresto, agsayasay ti dara. Ngem adda met agkuna a rumbeng laeng koma nga adda mairuar a mandamiento de aresto wenno warrant manipud Korte sakbay a maipatungpal ti panagpasuko.

Kuna met ti maysa a legal a luminaryo (DOJ Sec.) a no dagiti nawayawayaan ket saan a “heinous” ti krimen a nakabaludanna, uray saanda kanon a sumuko. Dagiti laeng kano heinous crime convicts ti nailatangan iti gunggona tunggal ulo. Innayon met ni Pres. Digong a rumbeng a mapapartak ti proseso ti pannakawayawaya dagiti balud a masakit ken nataenganen.

Awan kanon iti kabaelan dagitoy nga agaramid iti krimen no dagitoy ket mawayawayaan. Ti kano delekado ket dagiti kriminal a kumbiktado gapu iti illegal a droga. Nakarkaron a dumegdeg ti parikut iti droga iti kagimongan no saan a mariput dagitoy. Ngipen ti linteg ti katukad ti gunggona a P1 milyon kada ulo wenno dead or alive nga ita nga aldaw

(Septiyembre 19) ti deadline.

***

Iti kaudian a record ti Bureau of Correction (BuCor) agingga idi kalman (Sept. 18)... immaboten iti 964 a kumbiktado dagiti simmuko. Addan 432 iti nakuna a bilang ket addan idiay National Bilibid Prison (NBP). Malagip nga arig dua-ribu a convicts ti nakaaramid iti heinous crimes. Aminda ket nawayawayaan babaen iti GCTA Law. Ngem idi naibulgar ti “Freedom for Sale” impababtuog ni Pres. Duterte ti ultimatum- 15-aldaw... tapno sumukoda bayat a naipagna ti nainget nga imbestigasyon ken panagadal para iti pannakapabaro ti Implementing Rules and Regulations (IRR) ti GCTA law.

Naammuan nga iti baro nga IRR, awanen ti karbengan dagiti kumbiktado iti heinous crime a mawayawayaan. No sibibiag daydi lolok... siguro ket agmalarian iti nerbiyos wenno ungetna iti mapaspasamak. Yamakna a kaadduan kadagiti kumbiktado a balud a nawayawayaan ket nakataraydan kadagiti disso a narigaten a masurotan. Yamakna nga amangan ta bumalesen dagitoy a kriminal kadagiti tattao a nangpabalud kadakuada. No kabaelanda ti nangitultuloy iti killo ken illegal a negosyoda (nangruna iti droga) uray idi addada pay laeng iti likud ti rehas ti bilibid... nakarkaro itan ta nawayadan nga agdakiwas nangruna ket maimpluensiya ken babaknangen dagitoy. Isu nga agrelaks ka laeng, lolong, amangan ta tila adda dita manen a sasanto nga inka awagan. Amangan ta pati sairo ket mairagpinmo iti kararagmo.

***

Iti panagsasaruno dagiti inaramid ti Senado nga imbestigasyon... adu dagiti naungkat a bulok ti NBP wenno BuCor. Dayta ti gapuna no apay a nasuspende ti arig tallupulo nga empleado ken opisyales. Kinapudnona, adda pay tallo a nangangato nga opisyal ti NBP ti na-contempt ken nadetained idiay Senado. Kadagiti bangsit a naibutaktak, makapasidduker a maammuan nga adu gayam ti pagkuartaan dita NBP. Amin a sumrek manipud banag agingga iti “tilapia” wenno dagitay babbae a mayasmang kadagiti addaan pagbayadna. Siempre, naturalmente, pards, nga adda taga-sagat wenno check-point. Nakatanggaya dita dagiti dakulap para iti “pasuksok” wenno papetpet (lagay).

Tsk tsk... kasla makitkitakon ti pagtinnaganto dagiti bangsit a naibutaktak. Masukil amin a kinatao ken kabibiag dagitoy a suspendido nga empleado ken opisyal. Sapay koma ta ti karbenganda a pannusa ti maiyetnag tapno nanamenda met ti pait ken apges ti maibalud. Addanto pay naibulgar a sangkaturkik langaruden ti meal allowance tunggal balud, makurakot pay. Kinapudnona, rimmuar iti panagadal nga arig P13 pesos lang ti nailatang a gatad iti kada pannangan dagiti balud. Napananna ngay ti nakadakdakkel a gatad a naipondo dita?

He he... nagsuekda siguro iti adu a bulsa, kabsat. Isuda ti lumuklukmeg a kasla kadagitay natay a baboy a naipaanud iti Marikina river. Basnot: dagita koma kano a buwaya ken limatek ti maipaanuden tapno agnakemda. Relax laeng, pards... agpullodando amin dagita a sairo.

***

Gapu ta naikkat ngarud ni sigud a BuCor chief Nicanor Faeldon...siulimek a naguray ti sangapagilian no siasino ti isukat ni President Duterte. Saanna kanon nga ikkan iti puesto iti gobyerno ni Faeldon. Mayat, kuna ti kaadduan ngem adu ti agatap nga amangan ta kellaatto manen a maipuwesto.

Ngem iti daytoy a gundaway...nauray met laeng ti pannakaipatugaw ti baro a BuCor head.... iti kinatao ti maysa a Gerald Bantag. Adda kano talek ni Pres. Duterte iti kabaelan ni Bantag nupay imbutaktak ti presidente nga addaan daytoy iti kaso iti agdama. Adda ngamin napasamak a gulo iti Paranaque jail, mano a tawenen ti napalabas. Sangapulo a balud ti natay dita gapu iti napabettak a granada. Nauram ti pagbaludan. Nakassuan iti murder ni Bantag ngem naibaba iti homeside. Manarimaan pay laeng a magmagna ti kasona.

Saludsod: kasanon no daytoy (Bantag) ket maabak iti kasona? Maikkatto ngatan a BuCor chief? Insampitawda: apay awan ngatan ti mabalinda a maipatugaw a saan a kas iti maysa nga addaan kaso iti agdama? Kabaelanna ngata a dalusan ti bilibid a nagbalin kanon nga umok dagiti illegaledad? Kabaelanna ngata a pung-iren ti ipus ken sara dagiti buwaya dita a pagbaludan? Ultimo a ni senador itan a ni sigud a BuCor chief Roland “Bato” dela Rosa ket dina kano met nadalusan ti bilibid uray ammo ti amin iti kinaassidegna kenni Pres. Digong.

Sabagay...ditay ammo no ania ti planplannuen ni Pres. Duterte... no kasanona nga aramaten ni Bantag tapno masolbar ti adu a parikut dita NBP. Sapay koma ta solusyon ti maipakat dita saan ketdi a rebulosyon wenno kunsumisyon.

Kamaudiananna, kudos kenni apo Heneral idi Mayor itan a ni Benjamin Magalong a naisaang itay nabiit sadiay Senate hearing. Adu dagiti imbutaktakna a pasamak a mabalin a maaramat ti Senado iti imbestigasyonda. Kudos apo Mayor Magalong.

Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph