NANIMAHO na ang karneng baboy nga gibana-banang anaa sa 800 ka kilo diin ang uban niini gisunog niadtong Biyernes, Septiyembre 20 sa dike sa Macanhan, Barangay Carmen, Siyudad sa Cagayan de Oro.
Tungod niini nitumaw ang kabalaka nga apektado kini sa sakit.
Apan gibutyag ni Dr. Darryl Rasay, senior meat control officer sa Veterinary Office, nga posibleng naabtan kini sa pagkadaot ug gilabay.
“Assorted gyud siya nga cut-ups sa baboy, ang gitawag sa amo sa office mga 800 kilos more or less, gi-try siya og sunog pero wala lage witness kung kinsa gyud ang nakakita,” matud ni Rasay.
Gihupay usab niini ang kabalaka sa uban kon ugaling apektado kini sa gikabalak-an nga African Swine Fever (ASF).
“Posible siguro as a meat inspector sa ilang storage ba siguro nag-flactuate ang temperature so mao dayon na siya nga nadaot,” dugang pa.
Gidugang pa niini nga layo ra kini sa posibilidad nga apektado kini sa maong sakit tungod kay luwas ang Misamis Oriental ug ang siyudad sa maong sakit sa baboy.
Nanawagan usab kini sa katawhan nga i-report dayon kon ugaling adunay madiskobrehan nga susama niini ilabi na nga tungod sa isyu sa ASF ug alang na usab sa kaluwasan sa publiko.
Nanghangyo usab kini nga sa mga nagsuplay og karne nga kon ugaling dili malikayan nga madaot na ang karne, dili ilabay sa bisan asa nga lugar tungod kay delikado kini sa panglawas.