GIKOMPIRMAR sa Cagayan de Oro City Police Office (Cocpo) ang pagpang-recruit sa mga estudyante sa high school aron i-rehistro sa sunod nga eleksiyon niadtong Septiyembre 20 sa Butig, Marawi City.
Gikabutyag nga anaa sa di momenos 60 ka mga batan-on ug estudyante sa Iponan National High School ang gidala ni alyas Bula sa maong dapit.
“Confirmed more or less 60 students from Iponan National High School were allegedly brought to Butig, Marawi City by a certain Bula,” sa mensahe ni Police Major Evan Viñas, tigpamaba sa Cocpo.
Sa inisyal nga imbestigasiyon sa kapulisan nigawas nga gidala kining mga batan-on sakay sa puti nga Van ug giparehistro alang sa umaabot nga eleksiyon.
Nigamit ang maong mga batan-on og lahi nga ngalan aron marehistro.
Gibutyag usab sa 14-anyos nga lakip sa nakaparehistro sa maong dapit nga gihatagan sila og P300 matag usa paghuman og rehistro pag-abot sa Iligan City.
Luwas ra usab nga nakauli ang maong mga menor de edad sa ilang mga pamilya.
Gibutyag usab sa kapulisan nga pabalikon ang maong mga tinun-an aron makabotar ug gipasaligan nga hatagan sila og armas.
“To be find out pa kay dili consistent ang bata sa iya statement. Cocpo will go deeper pertaining to this issue po,” dugang ni Viñas.
Nidangop sa Police Station 7 sa Bulua ang mga ginikanan nga taga Zone 3, Baikingon human nga nabalaka sa dihang wala nakauli ang ilang mga anak gikan sa tunghaan ug giingong gi-recruit ug gipasakay sa puti nga van.
Sa pagsulat niini nga balita, ang maong insidente ang nakatala na sa police station ug gipasalig sa kapulisan nga palawman ang imbestigasiyon kalabot niini.