HUSTISYA ang singgit sa pamilya sa namatay nga kadete sa Philippine Military Academy (PMA) tungod sa giingong hazing niadtong Septiyembre 18 sa Fort Del Pilar sa Baguio City.
Base sa otopsiya sa patay nga lawas ni PMA Cadet 4th Class Darwin Dormitorio, 20, taga Cagayan de Oro City, giingong nakaangkon kini og mga bun-og sa iyang tiyan nga bahin timailhan nga gisumbag ug gipatiran kini.
Unang gikataho nga namatay si Dormitorio human nagsuka sulod sa barracks.
Nitumaw ang taho nga gikuryente ang pribadong parte sa lawas niini ug nagka-internal bleeding ingon man kidney damage.
Makita sa social media nga nagbaha ang pagpangayo og hustisya sa pamilya ug higala niini.
Samtang nagpadangat usab og pahasubo si Mayor Oscar Moreno ngadto sa pamilya sa namatay nga biktima ug gipanawagan ang otoridad nga imbestigahan pag-ayo ug nagdemanda og hustisya.
“We urge the authorities to thoroughly investigate the death and to leave no stone unturned. We also demand that justice be served regardless of any circumstance. Mr. Dormitorio's death should not pass unsolved,” sa pahayag ni Moreno.
Si Congressman Rufus Rodriguez usab ang nibutyag nga angayang matangtang diha sa PMA ang mga responsable.
Lakip usab si Senator Aquilino “Koko” Pimentel, kinsa Kagay-anon, ang nagpadayag usab sa pahasubo ug nagbutyag nga angayan kining imbestigahan.
“This is unacceptable and must be investigated immediately! We cannot turn a blind eye to this kind of violence in the country’s premier military training institution. Apparently, the situation was exacerbated by negligence in the medical treatment of this young man,” matud ni Pimentel.
Nagpagawas usab og opisyal nga pahayag ang Xavier University Ateneo de Cagayan kalabot na sa kamatayon ni Dormitorio kinsa nigradwar sa maong tunghaan sa Senior High School.
Nasayran nga gikompirmar nga namatay kini tungod sa hazing ug aduna nay tulo ka mga suspetsado nga gi-imbestigahan diin duha ka third class cadets o second year ug first class o 4th year.
Ni-viral usab sa social media ang pinaka-ulahing sulat ni Dormitorio kinsa naghangyo pa sa iyang pamilya nga kon makahigayon bisitahon kini apan kung apeke sa galastuhon padalhan nalang og gamay nga kwarta alang sa iyang uniporme ug gani naghangyo kini nga dalhan og doughnut ug pizza kon mobisita.