APRONIANITO FERRATER MIRAMON
Talisay, Santander, Cebu
GIBATI ko ang kamaya dihang nakagawas na sa South Bus Terminal ang Ceres nga akong gisakyan kauban ang akong asawa ug anak.Nahuwasan ang gibati ko nga pagpamuypoy sa akong mga lutahan tungod sa pagbinarog.Taas man god kaayo ang linya tungod sa kadaghang pasahero nga manguliay basta katapusan sa semana. Ug tungod sa kahinam nga makauli na gyud ko, bisan nagtadlas pa sa N. Bacalso Avenue kining among gisakyan, ingon sa nahiabot na ang akong handurawan ngadto sa amoa.
“Asa manaog , Sir?” maoy nakapaigking kanako ang konduktor dungan ang iyang pagkablit.Kadali ra diay nakong nakatagpilaw tungod kay wala koy kinatulgan.Mao man goy sabot namo sa akong asawa nga manglargo ra mig uli sa Santander inig-abot nako gikan sa trabaho.Unya kay ‘night shift’ man ko maong buntag na ko niabot sa among pinuy-anan sa Pardo.
“Sa Talisay,Santander..Tulo mi ka buok.”dayon kong tudlo sa akong anak ug asawa nga nahimutang diha sa atubangan sa akong gilingkuran samtang naghangad sa konduktor.
Unya nahinumdom ko kang Daryl,ang akong pag-umangkon nga mao usab ang una kong kinugos sa kumpirma.Kanunay ko niadto nga malibre sa pamilite matag higayon nga mouli ako sa among dapi;t unya maoy mataymingan kog sakay ang yunit sa bus nga iyang gikonduktoran. Apan takulahaw lang kining nawala human mo-resayin isip konduktor ning maong kompaniya sa bus.Walay nakahibalo kon asa na kini siya karon.Bisan gani ang iyang mga igsuon nga silang Junette ug Maricor kansang mga balay naa ra duol sa amoa di man usab makatug-an.
Septiyembre 1.Bisperas sa pista sa Parokya sa Bato nga ang patron niini mao ang Birhen sa Consolacion diin nahisakop ang among barangay. Human kami manimba sa misa konselebrada kauban ang akong pamilya. nakahukom akong abaniron kog suroy ug pamista ang tanan kong mga kaparyentihan kansang mga pinuy-anan dia sa among baryo.Misugod ko sa ilang Dodong Manuel ug Inday Casiana, dayong paingon sa ilang Tiya Gunda, dayong patighulog ko sa ilang Tiya Bebang.Didto nataudtauran ko tungod kay wala mabugto ang estoryahay namong Maribel, akong ig-agaw, kinsa taudtaod na sab nga wala ko igkita.Unya nasamutan pa gyud sa paghitangka ko sa panimalay nilang Roqueto, manghod ni Maribel ug ig-agaw igtagsa ko usab, kay didto ang iyang mga igsuon nga silang Ritchel, Raymund ug lain pa namong ig agaw nga si Melo, ug gidugangan pa nilang Shernan ug Ambo. Busa mainiton gyud kaayo ang among himamatay.
Walay puas ang estorya ug kataw-anay kay ‘sky is the limit’ ang tagay. Unya namatikdan kong diha si Junette maong ako untang pakisayran. Apan sa wala pa nako mabuka ang akong baba nahingangha kaming tanan. Ug labi pang di ako makatuo sa akong nakita. Gikipat-kipat ko ang akong mga mata apan di gyud ko mahimong masipyat.Si Daryl gyud ang nagpaingon sa among nahimutangan. Dako kaayo kinig ngisi samtang nagatan-aw kanako.
“Imong sugilanon ang napatik karon sa Superbalita, Pron,” matod niya kanako dayong bukhad sa mantalaan nga iyang gisipatan. Naanad na lang sab kong dili siya magtahod kanakog ninong ba o papa o unsa pa dihang puyde nga isangpit sa maninoy , tungod kay sama lang sa barkada ang pagtratar namo sa usag usa bisan kaniadto.
“Ako gyong gihagoag ari aron ibalita ninyo nga kang Apron nga sinulat ang napatik karon sa paborito tang mantalaan.” Daw wala siya pul-i sa pagbalik-balik sa iyang mga pulong. “Kon di pa tungod ani, basig di unta ko kahinumdom pagpamista dinhi.”
Wala na kami motubay pa sa iyang estorya. Amo siyang gitabangag dumog ug gakos, kaha tungod sa kamingaw nga among gibati ngadto kaniya.
“Diin ka ra man diay mopaingon pahunga ka?’hapit magkadungan kamig pangutana. “Didto ras Dumanjug, uy! Nagdrayb ra kog traysikol!” tug-an ni Daryl.
Gitagayan dayon ni Ambo si Daryl niadtong bugnaw ug puno sa bula nga beer ug misamot kaalegre ang among panagkita karong pistaha.
“Na! Unsang orasa kaha ko makapauli ani ron?” Gibati kog kabalaka apan wa koy plano nga moangka bisag magbuntagay pa og inom ug estorya. (KATAPUSAN)