SI Davao City’s Southeast Asian (SEA) Games 2015 double bronze medalist Maiquel Jawn “Mikee” Teh Selga mikumpirma nga nakasud siya sa national wakeboard ug waterski team alang sa umaabot nga 30th edition sa duwa nga himuon sa Pilipinas.
Ang 19-anyos nga nagtungha sa Malayan Colleges Mindanao (MCM) isip freshman sa multi-media arts nagkanayon nga di siya motigi sa boat-pulled women’s open wakeboard.
Inay moduwa siya sa waterski, partikular sa trick ski event.
“Part napo ako sa national team pero different type of sport po pero in line with wakeboarding parin. It’s called trick ski,” sigun niya.
Dugang sa batan-ong atleta, “Trick ski is still like wakeboarding but the board is thinner.”
Ni Selga nga nagsugod na siya og bansay sa Deca Wakeboard Park Davao sa Deca Homes Resort Residences (DHRR) sa Barangay Tacunan, Tugbok District.
Malaumon siyang makakuha og pagtugot gikan sa MCM aron siya makabansay sa Deca Clark Wakeboard Park sud sa usa ka bulan una ang 30th SEA Games 2019 nga himuon sa Nobyembre 30 ngadto Disyembre 11.
Ang kinamaguwangang anak sa arkitekto nga si Michael Anthony ug Pretty nagdugang nga ang iyang national team coach nakigsabot na sa Deca Wakeboard Park Davao asa siya magbansay.
Sa mas nipis nga board, suma niya nga mas lisud kini apan madasigon siyang makakat-on.