PATAY na nga nakaplagan ang 13 anyos nga tinun-an sa high school human gituohang nalumos niadtong nilabayng adlaw sa Balulang Riverside ning siyudad sa Cagayan de Oro.

Si Police Officer 3 Alvin Nacaya usa sa mirespondeng polis gikan sa Police Station 9 sa Macansandig niila sa biktima nga mao si Ibrahaim Sultan, taga Villa Angela, Balulang ning siyudad, tinun-an saÿCagayan de Oro City High School.

Gibutyag ni Nacaya sa Sun.Star Superbalita nga niadto pang Biyernes na-missing ang biktima mga alas 4:00 sa hapon.

Nasayran nga buntag ang klase niini hinungdan nga pag-uli sa puloy-anan mideretso sa suba ug nag-inusara nga naligo.

Walay nakamatikod niini kinsa gituohang nalumos na niadtong tungora labina nga gibutyag sa mga igsuon niini ngaÿdili makamao nga molangoy ang biktima.

Niadtong Sabado mga alas 8:30 sa buntag, nakaplagan ang patyang lawas nga naglutaw-lutaw sa suba sa usa sa mga residente sa Riverside sa Balulang.

Matud ni Nacaya nga wala miburot ang tiyan niini gawas lamang sa paglagom ug pagdako lang sa nawong samtang walay nakitang foulplay sa kamatayon sa biktima.

Sa pagsulat ning balita gilubong na ang patayng lawas subay sa tradisyon sa pamilyang Muslim.