BANSALAN, Davao del Sur - Duha ka mga menor de edad diin usa kanila namatay sa bay tambalanan human gidunggab og kutsilyo sa mga wa mailhing suspek didto sa Barangay Poblacion Uno, alas 3:30 sa kaadlawon, Sabado, Septyembre 21.
Si Police Major Rodante Varona, hepe sa kapolisan, nag-ila sa mga biktima nga mao sila si Welmar Arapok, 15-anyos ug Gabriel Jamal, 13-anyos, pulos molupyo sa Cosmos Street, Brgy. Poblacion Dos sa lugar.
Sumala ni Varona nga nahitabo ang insidente sa usa ka abandonadong balay sa lugar.
Nasayran nga si Arapok gideklarang dead on arrival sa Mabama Doctors Hospital human nakahiagom og daghang samad dinunggaban sa nagkadaiyang parte sa kalawasan.
Samtang si Jamal nadala pa sa bay tambalanan ug padayong nakigbisog didto sa Davao del Sur Provincial Hospital.
Padayong giimbistigahan sa kapolisan ang motibo sa insidente apan nanaghap sila nga personal nga bangi batok sa grupo sa mga batan-on ang nahimong pabilo sa krimen. (Orlando B. Dinoy)