MAGSAYSAY, Davao del Sur - Nangandam na ang mga nagkadaiyang tribu alang sa tigom-pasalamat atol sa pag-abri sa ika-12 nga Kialegnon Festival karong Septyembre 26.
Gibutyag ni Anthony Allada, municipal information officer sa lugar, nga sa pag-abri sa selebrasyon karong Huwebes, himuon ang ritwal-pasalamat dungan sa pag-abri sa selebrasyon ug nianang pagka-gabii ipahigayon ang "Hiyas sa Kialeg."
Sa ikaduhang adlaw, sumala ni Allada nga malingaw ang publiko sa lumba sa langoy ug mga hinimong bangka sa Bulatucan River.
Samtang, gibutyag ni Mayor Arthur Davin nga tulo ka adlaw lamang ang selebrasyon apan gihimo kining mabulukon alang sa mga sakop sa tribu.
Sa adlaw sa kulminasyon sa Septyembre 28, himoon ang Misa Pasalamat ug human niini mopasundayag ang mga sakop sa tribu sa costume parade diin pagasundan sa programa sa municipal gym.
Aduna sab live band concert nianang pagka-gabii atol sa Mayor's Night.
Dungan niini, gitataw ni Police Captain Jeffmar Tercero, hepe sa kapolisan, nga mas pahugtan nila ang seguridad karong semanaha kauban ang mga force multiplier sama sa barangay tanod, Barangay Peacekeeping Action Teams (BPATs) ug militar.
Nanghinaot sab ang mga opisyal sa lungsod nga mohatag ang tanan sa ilang kooperasyon alang sa kalampusan ug malinawong selebrasyon. (Orlando B. Dinoy)