BANSALAN, Davao del Sur - Gimando sa acting mayor ning lungsod ngadto sa Municipal Health Office (MHO) nga pa-imbistigahan ang namatay nga baboy nga gipalit sa usa ka pamilya gikan sa barangay sa miaging semana.
Gikumpirma ni Acting Mayor Eugene Clata nga nakadawat siya og impormasyon niadtong Dominggo, Septyembre 22, human misumbong ang tag-iya kaniya sa nahitabo.
Matod ni Clata ihawon unta ang baboy alang sa kasal apan gisayo na lang og ihaw kay namatay ang baboy.
Dihang naihaw na kini nasuta nga nalata ang tina-i sa baboy mao nga wa na giluto ang karne niini ug gisulod na lang sa refrigerator.
Karong adlawa, ipatawag sa opisyal ang tag-iya sa baboy sa iyang buhatan aron masubay ang nahitabo ug makuhaan og samples ang karne niini.
Nabalaka si Clata nga nakasulod na sa lungsod ang African Swine Fever (ASF) mao nga iya kining pa-imbistigahan.
Giawhag sab sa mayor ang publiko nga di magpataka og palit og karneng baboy ug seguroon nga miagi kini sa meat inspections. (Orlando B. Dinoy)