COMPOSTELA VALLEY - Upat ka mga lagyong sitio nga daw kalbaryo sa kalisod nga maadtuan gumikan sa kalayo og tungason, dungan nga gitukuran og mga tunghaan pinaagi sa sistema sa bayanihan didto sa probinsiya sa Compostela Valley niadtong adlaw’ng Biyernes, Septyembre 20.
Ang maong upat ka mga sitio sa probinsiya nga gitukuran ug gilauman nga mahuman nga matukod ang mga tunghaan sulod sa katorse ka mga adlaw mao ang Sitio Panlubog, Barangay Tibagon sa lungsod sa Pantukan, Sitio Side 4, Barangay Mangayon ug Purok 3, Panansalan Trokat sa lungsod sa Compostela, ug ang Sitio Bongloy sa Barangay Pagsabangan, lungsod sa New Bataan.
Nakatakdang isunod sa sunod semana isip pang lima nga sitio nga tukuran og tunghaan ang halayong dapit sa Sitio Danawan sa Barangay Manurigao sa lungsod sa New Bataan nga sumala pa naulahi gumikan sa kalisod sa pagdala sa mga materyales nga gamiton sa pagtukod.
Sa Sitio Bongloy, Purok 3, Barangay Pagsabangan, lungsod sa New Bataan dako ang kalipay nga gibati sa 80 ka mga pamilya nga molupyo sa dapit tungod sa nakita nga pagtagad ug aksyon nga gihimo sa mga lideres sa probinsiya ubos sa liderado ni Governor Jayvee Tyron Uy nga nagkahiusa sa Bayanihan sa pagkab-ot sa maong malampusong proyekto.
Sumala ni Barangay Kapitan Raymond Baugto sa Sitio Bongloy nga dako ang iyang pasalamat sa pagtukod sa maong tunghaan sa ilang dapit saglit dili na mubaktas og tag kilometro ang mga bata aron nga maka-eskwela.
Gikalipay usab og dako sa maong kapitan ang gihimong kalsada padung ngadto sa ubos nga bahin sa Sitio nga maoy ilang agianan sanglit matud pa nga kaniadto nga wa pa’y kalsada ang maong Sitio ginabaktas sa mga molupyo ang gilay-on nga walo kilometro padung ngadto sa patag aron makaabot sa highway.
Katambayayong sa probinsiya sa malampusong pagtukod og mga tulunghaan sa mga lagyong Sitio sa Compostela Valley ang Department of Education (DepEd) ComVal Division nga gipangulohan ni Dr. Reynante Solitario, Local Government Unit ug ang tagsa-tagsa ka mga indibidwal nga boluntaryong mitrabaho ug migahin sa ilang oras og serbisyo alang sa malampusong “Bayanihan sa Paaralan”. (Dexter T. Visitacion)