STO. TOMAS, Davao del Norte- Gipangdala sa balay tambalanan ang duha ka mga tawo nga nasamdan sa nahitabong tinigbasay sa Purok 4, Barangay Kinamayan, alas 11 sa gabii niadtong adlaw nga Sabado, Septyembre 21.
Nasamdan giila nga mao sila Michael Bergante Ramirez, 38-anyos, minyo ug Belly Cabunita, 54-anyos, minyo, pulos molupyo sa nahisgutang dapit.
Sa report nga nakuha gikan sa Davao del Norte Police Provincial Office nasayran nga alas 10:30 sa gabii, sa samang adlaw, usa ka Marlon Bergante Ramirez, 37-anyos, minyo ug molupyo sa samang dapit ang miabot sa balay ni Belly Cabunita nga niadtong higayona nakigtagay kauban ang mga silingan lakip si Michael Ramirez nga maguwang ni Marlon.
Matud pa nga nahitabo ang lalis tali kang Belly Cabunita ug sa magsuong Ramirez nga diin si Belly Cabunita mikuha og sundang sulod sa ilang balay ug gigukod ang magsoon.
Sumala pa nga si Michael naapsan ni Belly dayon gitigbas sa gibitbit nga sundang samtang si Marlon Ramirez gidepensahan ang igsoon pinaagi sa pag-atake kang Belly Cabunita gamit ang kahoy hinungdan nga nabuhian ang gihuptan nga sundang.
Dihang nabuhian ang sundang, gipunit sab dayon kini ni Marlon ug gigamit sa pagtigbas kang Belly diin ang maong hitabo nasaksihan ni Fernando Navarro, 45-anyos.
Sila Belly ug Michael nakahiagom og mga samad tinigbasan sa nagkadaiyang parte sa lawas samtang si Marlon gikustodiya sa Sto. Tomas Municipal Police Station lakip ang sundang nga gigamit sa pagtigbas. (Dexter T. Visitacion)