TACURONG CITY - Naulian na sa ilang maayong pangisip ang 15 ka estudyante nga giingong na-engkanto alas 2:00 sa hapon niadtong adlaw nga Biyernes, Septyembre 20, 2019, sa probinsiya sa Sultan Kudarat.
Matud ni Barangay Kagawad Jay-ar Tolentino sa Barangay Mamali Lambayong, Sultan Kudarat nga muabot sa 15 ka estudyante sa Mamali High School ang nasudlan og dautang espiritu.
Sumala ni Tolentino nga nagsugod nga nasudlan sa dautang espiritu ang mga biktima sa diha nga giputol ang dakong punuan sa mangga sulod sa tulunghaan.
Mitulirok ang mga mata, nagkisi-kisi (nangisay) nagsinggit-singgit unya kusgan kaayo ang 15 ka estudyante pagkahuman nangalipong.
Nagpatabang ang mga magtutudlo sa mga prayer leaders sa simbahan ug nahunong ang pagsanib sa dili makita nga nilalang o engkanto sa mga estudyante.
Giputol ang dakong punuan sa mangga gumikan delikado sa mga estudyante ug magtutudlo ang mga nangahulog niini nga sanga nga laya.
Dunay albularyo ang nag-ingon nga dunay engkanto nga nagpuyo sa mangga kinsa nasuko kini pag-ayo sa diha nga nasamdan ang duha ka anak niini atol sa pagputol sa punoan.
Gitakda nga magpahigayon og Misa sulod sa tulunghaan ug pabendisyonan ang punoan sa mangga aron molayas ang dautang espiritu.