NING puntoha, duha na lang ka mga boksidor ang naa sa listahan kabahin sa kon kinsa ang sunod nga makontra ni Filipino boxing icon Manny Pacquiao.
Matod sa representante ni Pacquiao nga si Sean Gibbons, naa ra nila ni Mikey Garcia o Danny Garcia ang sunod nga ikaharong sa Pambansang Kamao ng Pilipinas.
Si Pacquiao, 40, dayag sa iyang intensyon nga makig-away og balik kang American Floyd Mayweather Jr. apan hangtod karon hanap pa gihapon kining mahitabo hinungdan nga mopili na lang og laing boksidor ang 8-division world champion. Dili usab siya interesado sa exhibition rematch nga gisugyot ni Mayweather.
Matod ni boxing jounalist Michael Benson, ipahibalo na ni Pacquiao sa dili madugay kon kinsa ang iyang napilian nga sunod kontrahon.
“Mikey Garcia and Danny Garcia are the two frontrunners for Manny Pacquiao’s next fight, according to Pacquiao’s MP Promotions representative Sean Gibbons. The WBA welterweight champion is planning to weigh-up his options within the next month or so,” mensahe ni Benson sa Twitter. (ESL)